დიდუბე ჩუღურეთის საარჩევნო ოლქის მაჟორიტარი დეპუტატობის ყოფილი კანდიდატი ანა დოლიძე გამოდის ინიციატივით, რომ პარტიებმა – „ლელო“, „გირჩი“, „მოქალაქეები“ საბიუჯეტო დაფინანსება აიღონ და პანდემიით დაზარალებულთათვის ფონდი გააკეთონ.
„მედიაში ვრცელდება განცხადება, რომ რამდენიმე ოპოზიციური პარტია არ იღებს საბიუჯეტო დაფინანსებას. ეს მათი უფლება და გადაწყვეტილებაა. თუმცა, ამავე დროს, მატულობს იმ ხალხის რიცხვი, ვისაც ელემენტარული სარჩო არ აქვს. ყოველდღე ათობით ასეთი მოქალაქე მწერს. მაქვს შემოთავაზება: აიღონ ეს დაფინანსება ამ პარტიებმა (ლელო, პატრიოტები, გირჩი, მოქალაქეები) და გააკეთონ პანდემიით დაზარალებულთათვის ფონდი. სულ საკვებში და ელემენტარულ რაღაცებში რომ დახარჯონ ეს მილიონები, ძალიან ბევრ ხალხს გადაარჩენენ. ამით კობახიძე ვერც დააკომპლექსებს ვერავის და კარგ საქმესაც გააკეთებთ,“- წერს ანა დოლიძე.
შეგახსენებთ, 25 ნოემბერს, დაფინანსების თაობაზე ცესკოს წერილობით მიმართა: „ქართულმა ოცნებამ“, „ევროპული საქართველომ“, „ნაციონალური მოძრაობამ“ და მასთან ერთად საარჩევნო ბლოკში შემავალმა: – „მოძრაობა სახელმწიფო ხალხისთვის“, „პროგრესი და თავისუფლება“, „რესპუბლიკური პარტია“ და „ევროპელი დემოკრატები“. ასევე, „გიორგი ვაშაძე-სტრატეგია აღმაშენებელი“ და „კანონი და სამართალი“.
ცნობისთვის, ჩამოთვლილი პარტიებიდან ერთ-ერთმა, „პატრიოტთა ალიანსმა“ უკვე მიმართა ცესკოს დაფინანსების მოთხოვნით.
რაც შეეხება დანარჩენ ოთხს – „ლეიბორისტულ პარტიას“, „მოქალაქეებს“, „გირჩსა“ და „ლელოს“ – მათაგან ბუნდოვანია ლეიბორისტების და ლელოს პოზიცია. „მოქალაქეები“ და „გირჩი“ დაფინანსების მოთხოვნას ამ დრომდე კატეგორიულად გამორიცხავენ.
