„შატილის შემთხვევა უნდა იყოს გამოსაფხიზლებელი ზარი იმ ომთან დაკავშირებით, რომელიც საქართველოს გზებზე ხდება. პირდაპირ უნდა დადგეს საქართველოს მთავრობის პასუხისმგებლობა იმ უპატრონობაზე, რომელსაც ადგილი აქვს ქვეყნის მკვლელ გზებზე,“ – ამის შესახებ დიდუბე-ჩუღურეთის რაიონის დეპუტატობის დამოუკიდებელმა კანდიდატმა, „მოძრაობა ხალხისთვის“ ლიდერმა ანა დოლიძემ ბრიფინგზე განაცხადა.
„ის, რაც ხდება საქართველოს გზებზე, არის ომი ჩვენი მომავლის და ჩვენი ხალხის წინააღმდეგ. საქართველოში ყოველ წელს ავტოსაგზაო შემთხვევების შედეგად იღუპება დაახლოებით 500 ადამიანი, მათ შორის დაახლოებით 20 ბავშვი. ეს უფრო დიდი ციფრია ვიდრე იმ ადამიანების, რომელიც საქართველოს ბოლო ომში, სამაჩაბლოში დაიღუპა. ამ ვითარებაზე პირდაპირ პასუხისმგებელია საქართველოს მთავრობა, რომლის ხელმძღვანელობა დაკავებულია სამგლოვიარო, ლიტონი განცხადებებით და ამის უკან არ დგას არცერთი პასუხისმგებლიანი ნაბიჯი. მთავრობა ყოველწლიურად დონორობის წინაშე თავს იწონებს საგზაო უსაფრთხოებასთან დაკავშირებით, მაგრამ არცერთი უწყება, მათ შორის შინაგან საქმეთა სამინისტრო, რომელიც პირდაპირ პასუხისმგებელია „შავი წერტილების“ აღმოფხვრაზე, არაფერს აკეთებს. მეტიც, პასუხისმგებლობასაც კი არ იღებს იმ სტატისტიკაზე, რომელიც დღეს გვაქვს. სწორი სტრუქტურული რეაგირება და ქმედითი ნაბიჯები ნამდვილად შეამცირებს მსხვერპლს და ამის მაგალითია ჩვენხელა ევროპული ქვეყნები, სადაც ხუთჯერ ნაკლები ადამიანი იღუპება,“ – აღნიშნა ანა დოლიძემ ბრიფინგზე, რომელიც ხევსურეთის გზაზე დაღუპულთა ოჯახის წევრების მიმართ სამძიმრით დაიწყო.
