უმრავლესობის ლიდერი, მამუკა მდინარაძე აშს-ის საელჩოს განცხადებას ეხმაურება და ამბობს, რომ მსგავსი რეაქციები პარტნიორებისგან მოსალოდნელი იყო.
როგორც მდინარაძე ამბობს, პარტნიორებისთვის ინფორმაციის მისაწოდებლად ბევრს იმუშავებენ.
„არ დაგიმალავთ, რომ მოსალოდნელიც იყო მწვავე რეაქციები ჩვენი პარტნიორებისგან, ჩვენი მეგობრებისგან. რომ ავხსნათ, რით შეიძლება ეს გამოწვეული იყოს, მათ სცადეს და ნაწილობრივ გამოუვიდათ, რომ დღეს დაკავებული იქნა „ნაციონალური მოძრაობის“ თავმჯდომარე და როდესაც ამ ნიუსს მიიღებ ინფორმაციის სხვადასხვა წყაროებით, რა თქმა უნდა, ეს ნეგატიური ინფორმაციაა, მაგრამ როგორც კი გაერკვევი, რომ ამის იქით დგას მისი ძალადობა სახელმწიფოს წინააღმდეგ, მისი კანონის ჩარჩოებიდან გასვლა, ის რომ ეს ადამიანი უკვე მსჯავრდებულია კონკრეტულ დანაშაულზე წარსულში და ამის შემდეგ გახდა ამ პარტიის ფორმალური, მაგრამ მაინც თავმჯდომარე, ის საქართველოს პარლამენტის შენობაში იჭრებოდა, უკვე ბევრი კითხვის ნიშანი აღარ არის ამ საქმესთან დაკავშირებით. ამიტომ, ჩვენ ჩვენს მეგობრებთან კიდევ უფრო ბევრს ვიმუშავებთ, რომ ეს ინფორმაციები დეტალურად მივიდეს ყველა დაინტერესებულ მხარესთან“, – აღნიშნა მამუკა მდინარაძემ.
მისივე თქმით, ვერავინ გასცემს იმ რჩევა,ს რომ კანონი არ აღსრულდეს.
„არაგულწრფელი უნდა ვიყოთ, რომ ამ საკითხთან დაკავშირებით პასუხისმგებლობა არ ვიგრძნოთ ხელისუფლების წარმომადგენლებმა. რა თქმა უნდა, ესაა ძალიან კრიტიკული განცხადება, მაგრამ შევეცდებით ყველა ჩვენი საერთაშორისო პარტნიორი სიმართლეში დავარწმუნოთ. აქაა სიმართლე, რომ ადამიანმა თავად თქვა კანონის შესრულებაზე უარი და კანონის აღსრულების გზა არ შეიძლება ქვეყნისთვის დამზიანებელი იყოს. სახელმწიფო თუ არ გვექნა ვერც პარტნიორს დაველაპარაკებით და ვერც ვერსად შევალთ. როდესაც არჩევანის წინაშე დგახარ, სახელმწიფო გექნება თუ არა და შენს არჩევანს გააკრიტიკებენ თუ არა, უნდა თქვა, რომ ჯერ სახელმწიფო უნდა გქონდეს, კრიტიკასაც უნდა გაუძლო და მერე იმ გზაზეც უნდა ვიაროთ, რასაც ევროპულ ოჯახში დაბრუნება ჰქვია. ვერავინ ვერასდროს მოგვცემს რჩევას, რომ კანონი არ აღვასრულოთ“,-აღნიშნა მდინარაძემ.
ცნობისთვის, ნიკა მელიას დაკავებას ამერიკის საელჩო გამოეხმაურა, რომლის განცხადებაშიც ნათქვამი იყო, რომ დღეს საქართველომ უკან დაიხია ევროატლანტიკურ სახელმწიფოთა ოჯახში უფრო ძლიერი დემოკრატიისკენ მიმავალ გზაზე.
ყველა ინფორმაცია ნიკა მელიას საქმეზე ნახეთ ამ ბმულზე
განახლებადი: ნიკა მელიას დაკავების ფაქტს საერთაშორისო საზოგადოება ეხმაურება
