არ შეიძლება, თვითმმართველობის არჩევნებზე მიაბა საპარლამენტო არჩევნების ბედი, – ამის შესახებ “ქართული ოცნების” ერთ-ერთმა ლიდერმა, მამუკა მდინარაძემ განაცხადა.
“არ შეიძლება, რაც არ უნდა სხვა გარემოებები იყოს, ერთი რომელიღაც სხვა არჩევნების შედეგებზე, მაგალითად, თვითმმართველობის არჩევნებზე მიაბა საპარლამენტო არჩევნების ბედი და ასეთი კვაზი, მახინჯი პრაქტიქა შემოიტანო. თუმცა, მათ აქვთ მსჯელობის უფლება და თავისუფლება. ჩვენ ამაში ვერ ჩავერევით. ირკვევა, რომ ისინი შიგნით ლაპარაკობენ, თუ თვითმმართველობის არჩევნებში „ქართული ოცნება“ ვერ გაიმარჯვებს, ამ შემთხვევაში, მათ იმის ლეგიტიმაცია ექნებათ, რომ რიგგარეშე არჩევნები მოითხოვონ. მსგავს შეთანხმებაში კი არა, მსგავს მოლაპარაკებაში, საუბარში „ქართული იცნება“ მონაწილეობას ვერ მიიღებს. ვერ დავნერგავთ მახინჯ პრაქტიკას, რომ თუ საპარლამენტო არჩევნებში ამდენ პროცენტს მიიღებ, მოუგებ ან წააგებ, შემდეგ არჩევნებში ამ დათქმით გავაკეთოთ, ეს არ შეიძლება. დღევანდელ დღეს კი არა, ათი და 20 წლის შემდეგ პრიცესებს დავაზიანებთ ასეთი მახინჯი მიდგომით. ასეთი მიდგომა არ შეიძლება, წარმოუდგენელია და ჩვენ ამ პროცესში ვერ შევალთ“, – განაცხადა მამუკა მდინარაძემ.
შეგახსენებთ, რომ ბოლო დღეებია “ქართული ოცნებისა” და ოპოზიციის წარმომადგენლები აქტიურად განიხილავენ ინიციატივას, რომ თუ „ქართული ოცნება“ თვითმმართველობის არჩევნებზე ხმათა 48-50 პროცენტს ვერ მიიღებს, რიგგარეშე საპარლამენტო არჩევნები დაინიშნოს.
როგორც მამუკა მდინარაძე ამბობს, უცნობია ვინ არის ამ ინიციატივის ავტორი.
