„ოპოზიცია საერთოდ ბოლო პერიოდში დაკარგულია თარგმანში, თანმიმდევრულობაში, განცხადებებსა და ლოგიკაში“, – ამის შესახებ საგარეო საქმეთა მინისტრმა, დავით ზალკალიანმა ბრიფინგზე განაცხადა.
მისივე თქმით, ოპონენტებს არ სურთ, კარგად გაიგონ ის განცხადებები, რომლებიც საერთაშორისო პარტინიორებისა და ორგანიზაციების მიერ მათ განცხადებებში გაჟღერდა.
როგორც მინისტრი აღნიშნავს, არანაირ ლოგიკაში არ ჯდება აშშ-ის სახელმწიფო მდივნის ვიზიტი შიდაპოლიტიკური ინტერესებისთვის გამოიყენო.
„ღიმილის მომგვრელია და არასერიოზულია. არც კი ვააპირებ ამაზე პასუი გავცე ოპონენტებს, რადგან ეს არის გაუთვითცნობიერება და საერთაშორისო ურთიერთობების არცოდნა. ვიცი, რომ მათ შორის არიან ადამიანები, ვისაც აქვს საერთაშორისო ურთიერთობების გამოცდილება და ამას იყენებენ პოლიტიკური ინტერესებისა და მანიპულაციებისთვის. ვფიქრობ, ისინი საერთოდ ბოლო პერიოდში დაკარგული არიან თარგმანში, თანმიმდევრულობაში, განცხადებებსა და ლოგიკაში. არანაირ ლოგიკაში არ ჯდება აშშ-ის სახელმწიფო მდივნის ვიზიტი შიდაპოლიტიკური ინტერესებისთვის გამოიყენო. აქ უმთავრესი გზავნილი არის აშშ-ის მხრიდან საქართველოს სტაბილურობის მხარდაჭერა, ქვეყნის პოლიტიკური, ეკონომიკური განვითარება. რეგიონში ჩვენი როლის, როგორც ერთ-ერთი ლიდერი ქვეყნის წარმოჩენა. ესაა ვიზიტის მთავარი გზავნილი და არა ის, რაზედაც ოპონენტები საუბრობენ.
აშშ-ის საელჩოს განცხადება, რომელიც არჩევნების შემდგ გავრცელდა, ეს ხომ აშშ-ის მთავრობის პოზიციაა. რა განსხვავებულ გზავნილს ელოდებიან ისინი სახელმწიფო მდივნისგან?! რა განსხვავებული გზავნილი უნდა იყოს?! ელჩი აჟღერებს აშშ-ის პოზიციას. კარგად წაიკითხონ ეს განცხადება! ამერიკა მხარს უჭერს ქვეყნის სტაბილურობასა და ეკონომიკურ განვითარებას. ესაა მთავარი გზავნილი და უმჯობესია, ისინი დროულად ჩაერთონ პოლიტიკურ პროცესში“, – განაცხადა ზალკალიანმა.
მაიკ პომპეოს ვიზიტი საქართველოში 17-18 ნოემბერს შედგება.
