ქუთაისში არასამთავრობო ორგანიზაცია „ევროპა ჩვენი სახლიას“ წევრები ქალაქის მერიას და იმერეთის სამხარეო ადმინისტრაციას მიმართავენ, რომ 2023 წელს დაგეგმილ 21 წლამდე ნაკრებთა ევროპის ჩემპიონატის მატჩები ქუთაისში გაიმართოს. ამის შესახებ „ევროპა ჩვენი სახლიას“ წევრებმა ბრიფინგი გამართეს.
„საფეხბურთო ტრადიციებით და საფეხბურთო სანახაობის მიმართ მაყურებელთა მაღალი ინტერესით გამორჩეული ქუთაისი ტურნირის მიღმა რჩება. მიმდინარე კრიზისის და ეკონომიკური დეპრესიის ფონზე პრესტიჟული ტურნირის მასპინძლობა ხელსაყრელი მდებარეობისა და ევროპის ქალაქებთან იაფიანი ფრენების არსებობის ფაქტორის გათვალისწინებით, ქუთაისის მიმართ ინტერესის და ეკონომიკური იმპულსების ზრდის შანსიც იქნებოდა.
მივმართავთ ქუთაისის მერს და იმერეთის გუბერნატორს იმოქმედონ ქალაქისა და რეგიონის ინტერესებიდან გამომდინარე და ფეხბურთის ფედერაციასთან განიხილონ 2023 წლის 21 წლამდელთა საფეხბურთო ჩემპიონატის ერთ-ერთი მასპინძელი ქალაქის სტატუსის მოპოვების შესაძლებლობა“, – აცხადებენ ისინი.
„უეფა“-ს გადაწყვეტილებით, 2023 წლის 21 წლამდე ნაკრებთა ევროპის ჩემპიონატს საქართველო და რუმინეთი უმასპინძლებს. აღნიშნული გადაწყვეტილება, ევროპული ფეხბურთის მმართველმა ორგანომ 3 დეკემბერს გამართულ აღმასრულებელი კომიტეტის სხდომაზე მიიღო.
ავტორი: კესო მოლაშხია
