“ნაციონალური მოძრაობის” ერთ-ერთი წევრი სალომე სამადაშვილი „პალიტრანიუსის“ გადაცემა „რეზიუმეში“ აცხადებს, რომ ის მისი თანაპარტიელის, ნიკა მელიას დაკავებას არ დაუშვებს.
„იმ პრობლემატურ საქმეებს, რომელიც უმრავლესობასა და ოპოზიციის შეთანხმების გზებს ხერგავს, ხვალ ან ზეგ დამატებით ახალი პოლიტპატიმარი გაჩნდება ნიკა მელიას სახით. ვინ მიდის ამ ნაბიჯებზე? – „ქართული ოცნება“. ჩვენ ვაპირებთ, ძალიან მაღალი რეზონანსი შევქმნათ ამის გარშემო, მათ შორის საერთაშორისო ასპარეზზე. არავინ აპირებს „გაატაროს“ ეს საქმე.
არ ვიცი, რას ფიქრობს „ქართული ოცნება“, რადგან ეს მისთვის ძალიან დიდი თავსატეხი იქნება. დარწმუნებული ვარ, ეს გაამძაფრებს როგორც ქვეყნის შიგნით საპროტესტო მოძრაობას, ასევე გაიზრდება ჩვენი საერთაშორისო პარტნიორებისგან ზეწოლა. არავინ აპირებს გაატაროს საქართველოში ახალი პოლიტპატიმრის შექმნა და მთავარი ოპოზიციური პარტიის თავმჯდომარის დაკავება. ამიტომ „ქართული ოცნების“ ხელშია არჩევანი.
რასაც დღეს „ქართული ოცნება“ აკეთებს, ეს არის წერტილის დასმა შეთანხმების მცდელობისთვის. ეს ორი წლის ბავშვისთვისაც გასაგებია. ახალი პოლიტიკური პატიმრის გაჩენა ქვეყანაში სერიოზული გამოწვევა იქნება „ქართული ოცნებისთვის“, – განაცხადა სამადაშვილმა.
