“პარლამენტში შესვლაზე ამ კონკრეტულ გადაწყვეტილებას საბოლოო გავლენა არ ექნება, იმიტომ, რომ ამასთან ერთადაა ვადამდელი ან ახალი არჩევნების მოთხოვნა და საარჩევნო ადმინისტრაციის რეფორმა, – ამის შესახებ „ევროპული საქართველოს” წევრმა გიგი წერეთელმა დავით გარეჯის საქმეზე ბრალდებული ნატალია ილიჩოვასა და ვალერი მელაშვილისთვის აღკვეთი ღონისძიების შეცვლის შესახებ საუბრისას განაცხადა.
„ეს არის აბსოლუტურად მიუღებელი. კარგია, რომ იქნება სხვა გაწყვეტილება რისი მოლოდინიც არის. თუმცა, გირაოც არ უნდა იყოს საჭირო. ეს იქნება პასუხი იმ განწყობებზე და იმ აღშფოთებაზე, რომელიც საზოგადოებაშია. ოპოზიციის ერთ-ერთი მთავარი მოთხოვნა პოლიტიკური კრიზისის განსამუხტად არის სწორედ პოლიტიკურად მოტივირებულ საქმეებში მყოფი ადამიანების გათავისუფლება და ეს იქნება სწორი და კარგი ნაბიჯი. რაც შეეხება სამომავლოდ რაზე იმოქმედებს ეს, იმოქმედებს პოლიტიკური პროცესის განუხტვაზე და ოპოზიციის შეთავაზებების ჭრილში, ამას ჩვენ ვნახავთ. რაც ეხება მომავალ მოლაპარაკებას და ოპოზიციის გეგმებს, რა თქმა უნდა, მოთხოვნები უცვლელია. ის, რომ პოლიტპატიმრებად წოდებული ადამიანები და ასეთი კვალიფიკაციის არ უნდა იყვნენ დემოკრატიულ ქვეყანაში, ეს ხომ ფაქტია. ამის იქით არის არჩევნები, რამაც საქართველოს პოლიტიკურ ცხოვრებაში ახალი ეტაპი უნდა მოიტანოს და რა თქმა უნდა, თანმდევი საარჩევნო რეფორმა’,- განაცხადა წერეთელმა.
ცნობისთვის, გენერალურმა პროკურატურამ ვალერი მელაშვილისა და ნატალია ილიჩოვასადმი აღკვეთი ღონისძიების შეცვლისა და მათთვის გირაოს შეფარდების შუამდგომლობის თხოვნით მიმართავს.
