არსებობს სათანადო სიმძლავრეები, რომ საქართველომ მიიღოს სამივე ტიპის ვაქცინა, – ამის შესახებ დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელმა, ხათუნა ზახაშვილმა განაცხადა.
მისივე თქმით, საქართველო გაწევრიანებულია „კოვაქსის“ პლატფორმაზე, სადაც პირველი შენატანი გადახდილი აქვს ქვეყანას და ელოდება ვაქცინის მოწოდებას. ამასთან მიმდინარეობს ინდივიდუალური მოლაპარაკებები მწარმოებლებთან.
„კოვიდის საწინააღმდეგო ვაქცინები, ჯერჯერობით რაც არის ცნობილი, შეიძლება ინახებოდეს სამ განსხვავებულ ტემპერატურაზე. ქვეყანაში ახლა არსებობს სათანადო სიმძლავრეები, რომ მიიღოს და გამოიყენოს სამივე ტიპის ვაქცინა. რეალურად, მიმდინარეობს სრული მოსამზადებელი სამუშაოები, რათა ეს მზადყოფნა იყოს სრულფასოვანი და ადამიანებს ვაქცინა მიეწოდოთ უსაფრთხოდ, ეფექტურად და დროულად. სამივე ტიპის მიღების შანსი აქვს ქვეყანას. დღესდღეობით მეტი ინფორმაცია არავის აქვს, რომელი ვაქცინა იქნება, თუმცა შემიძლია, სრული პასუხისმგებლობით გითხრათ, რომ ქვეყანაში მზადყოფნა სამივე ვაქცინის მიღებისთვის არსებობს.
ვართ მოლოდინის რეჟიმში. საქართველო გაწევრიანებულია „კოვაქსის“ პლატფორმაზე, სადაც პირველი შენატანი გადახდილი აქვს ქვეყანას და ელოდება ვაქცინის მოწოდებას. საქართველო დგას ასე ვთქვათ, ქვეყნების რიგში, რომლებიც ამ პლატფორმაზე არიან და ვაქცინას ელიან ამ პლატფორმიდან. მეორე მხრივ, საქართველო აწარმოებს ინდივიდუალურ მოლაპარაკებებს მწარმოებლებთან, სხვადასხვა ქვეყანასთან და ცდილობს კიდევ დამატებითი დოზების შემოტანას“, – განაცხადა ხათუნა ზახაშვილმა “პირველი არხის” ეთერში.
