დღეს თბილისის „ლოკომოტივი“ ევროპა ლიგის საკვალიფიკაციო ეტაპის მეორე მატჩში მოსკოვის „დინამოს“ დაუპირისპირდება. შეხვედრა თბილისში, მიხეილ მესხის სახელობის სტადიონის სათადარიგო მოედანზე გაიმართება და 21:00 საათზე დაიწყება.
თამაშის დაწყებამდე ორივე გუნდის მთავარმა მწვრთნელმა მატჩისწინა პრესკონფერენცია გამართა. რუსული კლუბის მთავარმა მწვრთნელმა ჟურნალისტებთან მოედნის საფარის მდგომარეობაზე ისაუბრა და განაცხადა, რომ ასეთი დაბალი დონის საფარი დიდი ხანია არ უნახავს:
„შეხვედრა უმაყურებლოდ ტარდება და სტადიონიც ამას სრულად შეესაბამება. სამწუხაროდ, ასეთი ცუდი მინდორი დიდი ხანია არ შემხვედრია.
იმის გათვალისწინებით, რომ ასეთი დონის მოედნები შორეულ წარსულში იყო, თანამედროვე პერიოდში ძალიან გასაკვირია ასეთი დაბალი დონის საფარი.
ამის მიუხედავად, გუნდები თანაბარ მდგომარეობაში არიან და იმედია, მოედანი კარგი ფეხბურთის თამაშში ხელს არ შეგვიშლის“, – განაცხადა მოსკოვის „დინამოს“ მთავარმა მწვრთნელმა კირილ ნოვიკოვმა.
