ამ წუთებში აჭარის ფინანსთა და ეკონომიკის სამინისტროსთან გონიოში მცხოვრები 100 -მდე ოჯახი წლების განმავლობაში მათ სარგებლობაში არსებული მიწის ნაკვეთების საკუთრებაში დარეგისტრირების მოთხოვნით საპროტესტო აქციას მართავს. აქციის მონაწილეებმა გზა გადაკეტეს.
როგორც აქციის მონაწილეები აცხადებენ, წინა ხელისუფლების დროს მათ ეს მიწის ნაკვეთები ჯერ დაუკანონეს, შემდეგ კი ჩამოართვეს.
მათივე განცხადებით, 2012 წლიდან “ქართული ოცნება” წინასაარჩევნოდ მუდმივად პირდებოდა მათ მიწის ნაკვეთების დაბრუნებას, თუმცა დღემდე უშედეგოდ ელოდებიან დანაპირების შესრულებას.
როგორც აქციის მონაწილეები აცხადებენ, აღიარების კომისიამ დაუბრუნა მათ ეს მიწის ნაკვეთები, თუმცა ფინანსთა და ეკონომიკის სამინისტრო აფერხებს ამ კანონიერების აღსრულებას. ქონდათ არაერთი შეხვედრა მინისტრთან და შესაბამისი სამსახურების წარმომადგენლებთან, თუმცა შედეგს ვერ მიაღწიეს.
აქციის მონაწილეები აჭარის ფინანსთა და ეკონომიკის მინისტრ ჯაბა ფუტკარაძესთან შეხვედრას ითხოვენ.
ისინი სამინისტროს კიბეებზე განლაგდნენ და აცხადებენ, შენობის ბლოკირებას მოაწყობენ, არავის შეუშვებენ და აქ იქნებიან, სანამ მინისტრი არ შეხვდება მათ. პარალელურად კი გზის გადაკეტვას აანონსებენ.
„წლების განმავლობაში მიმდინარე საპროტესტო აქციების შედეგად მოსახლეობის ნაწილმა დაიბრუნა მიწები, ნაწილი კი დღემდე ველოდებით დანაპირების შესრულებას. როცა ხელისუფლება არ მოდის ხალხთან, ჩვენ მოვედით აქ. დაგვიკანონონ ჩვენი მიწის ნაკვეთები. ამ მიწას წლებია ვამუშავებთ და ჩვენია. ხომ უნდა გაგვცეს მინისტრმა პასუხი. გვეუბნებიან არ არის ადგილზეო. დაველოდებით აქ და არ წავალთ“, – აცხადებენ აქციის მონაწილეები.
ადგილზე მობილიზებული არიან სამართალდამცავები.
ავტორი: ნაირა ქობულაძე
