აჭარის მთავრობის ადმინისტრაციული შენობის მიმდებარე ტერიტორიაზე, ე.წ. „თავისუფლების კვარტალში“ ოპოზიციური ერთობის საპროტესტო აქცია 33-ე დღეა გრძელდება.
დღეს გაერთიანებული ოპოზიცია მასშტაბურ აქციას მართავს, რომელსაც თბილისიდან მხარდამჭერები შეუერთდნენ.
როგორც აქციის ორგანიზატორები აცხადებენ, დღევანდელი აქცია ჩატარდება პანდემიის შესაბამისი რეგულაციების, სოციალური დისტანციის სრული დაცვით და სავალდებულო თერმოსკრინინგით.
აქციის თითოეულ მონაწილეს დაურიგდება პირბადე, ხოლო რისკჯგუფში მყოფ მოქალაქეებს მოუწოდებენ, დისტანციურად გამოუცხადონ სოლიდარობა.
„არ არის გამარჯვება მარტივად მოსაპოვებელი. ჩვენი მოთხოვნა უცვლელია, ახალი სამართლიანი არჩევნების ჩატარება.
როცა გვართმევენ არჩევანის უფლებას, გვართმევენ თავისუფლებას. ადრე თუ გვიან ჩვენი ბრძოლა გამარჯვებით დასრულდება. ეს არის ბრძოლა ამ ქვეყნის ხვალინდელი დღისთვის, ჩვენი თავისუფლებისთვის.
ხელისუფლება გვიცხადებს, არ გადაიხედება არჩევნების საკითხიო. გადაიხედება, აუცილებლად გადაიხედება, იმიტომ რომ, ეს არის ხალხის ნება. 52 პროცენტი ამ ქვეყნის მოსახლეობის არ აღიარებს არჩევნების შედეგებს. აუცილებლად ჩატარდება ხელახალი არჩევნები.
ჩვენ უნდა ავიღოთ პასუხისმგებლობა საკუთარ თავზე და ამ ნერვების ომში მორალური უპირატესობა ჩვენს მხარესაა. არ ჩამოვუშვათ ხელები, არ მივეცეთ უიმედობას და ყველაფერი გამოვა. მთავარია ბოლომდე მივიყვანოთ ეს ბრძოლა.
თუ უკან არ დაიხევს ხელისუფლება, ახალ წელსაც აქ შევხვდებით, გაზაფხულსაც და მანამ ვიქნებით აქ, სანამ ხალხის მოთხოვნები არ შესრულდება. მოვუწოდებ ხელისუფლებას, წამოვიდნენ კომპრომისზე. მოვუწოდებ ჩვენს მხარდამჭერებს, ბრძოლა გამარჯვებით სრულდება, როცა მართალი ხარ.
თუ ასე მტკიცედ ვიდგებით ბოლომდე, თუ არც ერთი ნაბიჯი არ იქნება უკან, გამარჯვებას აუცილებლად მივაღწევთ. ბრძოლა თავისუფლებისთვის გრძელდება“, – განაცხადა „ენმ-ის“ ერთ-ერთმა ლიდერმა მირდატ ქამადაძემ.
შეგახსენებთ, ხელახალი არჩევნების ჩატარების მოთხოვნით აჭარის მთავრობის სახლთან გაერთიანებული ოპოზიცია აქციას მართავს.
ავტორი: ნაირა ქობულაძე
