აჭარის მთავრობის სახლთან ე. წ. „თავისუფლების კვარტალში” სხვადასხვა ახალგაზრდული ორგანიზაციის წევრებმა აქცია-პერფორმანსი გამართეს.
როგორც აქციის მონაწილეებმა განაცხადეს, მათ არ სჯერათ, რომ ბიძინა ივანიშვილი პოლიტიკიდან მიდის.
„ბიძინა ივანიშვილი მორიგ არაფორმალურ მმართველად რჩება. მისი პოლიტიკიდან წასვლის წინაპირობა იყო ის, რომ ამერიკაში იცვლება ხელისუფლება და მას დიდი შიში აქვს სანქციებისა და როგორც ყოველთვის უფრთხის იმას, რომ შეინარჩუნოს თავისი ფული. აქ შეკრებილია ახალგაზრდული მოძრაობები, რომლებსაც ბიძინა ვერ მოგვატყუებს და ფერად ფურცლებზე ჩამოვწერეთ 41 პრობლემა, რომელიც აჭარას დაუტოვა, ხოლო აჭარის გარდა 441 პრობლემაც კი შეიძლება შეგროვდეს რაც საქართველოში დატოვა”,- განაცხადა აქციის ერთ-ერთმა მონაწილემ ლაშა კომახიძემ.
ცნობისთვის, აჭარის მთავრობის სახლთან ხელახალი არჩევნების მოთხოვნით გაერთიანებული ოპოზიცია ორ თვეზე მეტია აქციებს მართავს.
ავტორი: ნაირა ქობულაძე
