გუშინ აჭარის მთავრობის სახლთან მიმდინარე გაერთიანებული ოპოზიციის აქციაზე, ადმინისტრაციული სამართალდარღვევის ფაქტზე დაკავებული ექვსი პირის სასამართლო პროცესი გაიმართა.
ბათუმის საქალაქო სასამართლოს მოსამართლე, კობა გოცირიძემ ექვსივე მათგანი, ირაკლი ჭელიძე, მუხრან ბერიძე, თორნიკე ჭელიძე, მინდია მელაძე, ზურაბ ბიბინიძე და რამაზ შაინიძე შვიდდღიან პატიმრობაში დატოვა.
როგორც “ერთიანი ნაციონალური მოძრაობის” ერთ-ერთი ლიდერი მირდატ ქამადაძე აცხადებს, აქციის მონაწილეები უკანონოდ არიან დაკავებული და შერჩეულ სამართალთან გვაქვს საქმე.
“რატომ შერჩევითი სამართალი, – რამდენიმე ფაქტი შემიძლია გავიხსენო, აქციაზე “ქართული ოცნების” ორგანიზებით 2-3 ადამიანი მოვიდა და აქციის მონაწილეების მიმართ იგინებოდა, ილანძღებოდა და სამართალდამცავებს არ ემორჩილებოდნენ.
ეს ადამიანები სასამართლოშიც კი არ წარმსდგარან ისე გაათავისუფლეს, ხოლო მშვიდობიანი აქციის მონაწილეები კი წინასწარი დაკავების იზოლატორში გადაჰყავთ…
მოგეხსენებათ, 41 დღეა აქცია იმართება, აქცია მშვიდობიანია და კონსტიტუციის ჩარჩოებიდან არ გადადის”,- განაცხადა მირდატ ქამადაძემ.
შეგახსენებთ, გუშინ აჭარის მთავრობის სახლთან ე. წ. ” თავისუფლების კვარტალში” მიმდინარე აქციაზე სამართალდამცავებსა და აქციის მონაწილეებს შორის ფიზიკური დაპირისპირება მოხდა, რის შემდეგაც ექვსი პირი დააკავეს, ხოლო ერთი პოლიციელი დაშავდა.
ავტორი: ნაირა ქობულაძე
