პოლიციამ ბაგებში დაჭრის ფაქტზე ორი პირი დააკავა. ინფორმაციას ამის შესახებ შინაგან საქმეთა სამინისტრო ავრცელებს.

უწყების ცნობით, ერთი პირი განზრახ მძიმე დაზიანების, ხოლო მეორე დანაშაულის შეუტყობინებლობის ბრალდებით დააკავეს.

„გამოძიებით დადგინდა, რომ მიმდინარე წლის 27 ივნისს, თ.კ.-მ საბაგიროს თანამშრომელს, 1987 წელს დაბადებულ გ.ფ.-ს ცივი იარაღით ჭრილობები მიაყენა და მეგობართან – ა.მ.-სთან ერთად, შემთხვევის ადგილიდან მიიმალა.

სამართალდამცველებმა ორივე მათგანი, მომხდარიდან რამდენიმე საათში, ცხელ კვალზე დააკავეს.

გამოძიება სისხლის სამართლის კოდექსის 117-ე და 376-ე მუხლებით მიმდინარეობს, რაც ჯანმრთელობის განზრახ მძიმე დაზიანებას და დანაშაულის შეუტყობინებლობას გულისხმობს“,- ნათქვამია გავრცელებულ ინფორმაციაში.

შემთხვევა გუშინ, 27 ივნისს მოხდა. ურთიერთშელაპარაკების ნიადაგზე საბაგიროს დაცვის თანამშრომელს თავს დაესხნენ და ჭრილობა მუცლის არეში მიაყენეს.