ბათუმის საქალაქო სასამართლოს მოსამართლე კობა გოცირიძემ გუშინ საპროტესტო აქციაზე დაკავებული “ალტერნატივას” ხელმძღვანელი ხათუნა ბერიძე 1500 ლარით დააჯარიმა.
„როგორც ხდება ხოლმე, წინასწარ ყველაფერი ცნობილია ამ სასამართლოსთვის და იციან რა განაჩენიც უნდა დადგეს. ჩვენც ვიცოდით და მზად ვიყავით. დაპატიმრება ვერ გამოიყენეს იმის გამო, რომ 10 წლის შვილი მყავს და კანონით არ შეიძლება. სამარცხვინო განცხადება გააკეთა მოსამართლემ. 1500 ლარით დამაჯარიმა. გამიხსენა ის საქმეები, რომელიც საერთოდ კავშირში არ იყო ამ პროცესთან. მოვითხოვეთ მოსამართლის აცილება. ყველა ხელისუფლების დროს ეს მოსამართლე ოპოზიციას ებრძვის. პოლიციამ რომ თქვას, „ალტერნატივას” წევრები ვაუპატიურებდით პილიციას, შეიძლება ამის გამო გაგვასამართლონ ისე, რომ მოსამართლე მტკიცებულებას არ მოითხოვს.
მოგვცეს ნახევარი საათი მტკიცებულების მოსაპოვებლად. ვითხოვეთ გადადება. ყველაფერს აკეთებს დღევანდელი სასამართლო და ხელისუფლება, რომ აღარ გაჩნდეს ზედმეტი პროტესტის კერა და ჩაიხშოს მუხტი. ეს არის პოლიტიკური დევნა. რასაც ითვალისწინებს კანონი 2000-ლარიან ჯარიმას, გადავიხდი, ოღონდ რატომ მაკავებ. თან ძალის გადამეტებით. ასეთი უსამართლობის გამო ვდგავარ იქ, სადაც უნდა ვიდგე “- განაცხადა ხათუნა ბერიძემ.
შეგახსენებთ, გუშინ კომენდანტის საათის დროს გამართულ აქციაზე პოლიციამ 11 პირი ადმინისტრაციული წესით დააკავა. სასამართლომ აქციის 7 წევრი 1000- 1000 ლარით დააჯარიმა.
ავტორი: ნაირა ქობულაძე
