ბათუმში ე.წ. „ხოფის ბაზრობის“ მოვაჭრეები აქციას მართავენ. ისინი მაღაზიების გახსნასა და საქმიანობის ნებართვას ითხოვენ.
როგორც აქციის მონაწილეები აცხადებენ, უსამართლო და დისკრიმინაციულია სავაჭრო ცენტრებისა და მოლების გახსნა, მაშინ, როცა ბაზრობებს ფუნქციონირების უფლება არ მიეცა.
„მძიმე სოციალურ მდგომარეობაში ვართ, გვაქვს საბანკო ვალდებულებები, ულუკმაპუროდ ვართ დარჩენილი. ჩვენი მდგომარეობაც ხომ უნდა გაითვალისწინოს მთავრობამ.
ჩვენი მოთხოვნაა, მოგვცენ მუშაობის უფლება. ეს ერთი კვირაც ჩვენთვის რაღაცას ნიშნავს. არ იფიქროთ ამ ერთ კვირაში დიდი შედეგი მივიღოთ ან ჩვენი ფინანსური მდგომარეობა გამოსწორდეს. არა, მაგრამ ახლა თუ არ გავყიდეთ ზამთრის საქონელი, მერე ვეღარ გავყიდით და უფრო დიდ ზარალს ვნახავთ.
მოგვცენ მუშაობის უფლება და ჩვენ ყველა წესს დავიცავთ და დისტანციასაც გავაკონტროლებთ- აცხადებს ხოფის ბაზრობის ერთ-ერთი მოიჯარე.
ე.წ. ხოფის ბაზრობის ხელმძღვანელის ზვიად მელიქაძის განცხადებით ადმინისტრაცია ვერ აიღებს კონტროლის პასუხისმგებლობას და თითოეულმა მოიჯარემ უნდა გაითავისოს არსებული მძიმე ეპიდსიტუაცია.
მესმის მივაჭრეების გულისტკივილი. მაგრამ ჩვენს ბაზრობაზე სულ მცირე 22 მოიჯარე გარდაიცვალა ვირუსით. ყოველდღიურად 50 ადამიანი იღუპება.
მესმის ამ ადამიანების, გვერდით ვუდგავარ და მათი გაჭირვება ჩემი გაჭირვებაა. მარტო ადმინისტრაცია ვერ შეძლებს კონტროლს ანუ მოიჯარებიც უნდა დაგვიდგნენ გვერდით. კონსულტაციები გახსნასთან დაკავშირებით მიმდინარეობს მთავრობაში.
წესების დაცვა ვერ ხერხდება და ადმინისტრაცია ვერ გააკონტროლებს. პასუხისმგებლობა თითოეულმა რომ გაითვალისწინოს კარგი იქნება”,- აცხადებს ხოფის ბაზრობის დირექტორი.
როგორც აქციის მონაწილეები აცხადებენ, თუ ხელისუფლება არ გაითვალისწინებს მათ მოთხოვნას, დაუმორჩილებლობას გამოაცხადებენ და სავაჭრო ობიექტებს მაინც გახსნიან.
ავტორი: ნაირა ქობულაძე
