ბათუმში კორონავირუსით მოქმედი ექიმი ილია ბერიძე გარდაიცვალა. ის 14 ნოემბრიდან მკურნალობის კურსს „მედცენტრში“ გადიოდა. როგორც კლინიკაში აცხადებენ, პაციენტს აღენიშნებოდა პნევმონია და ფილტვის ქსოვილის 80 პროცენტი ჰქონდა დაზიანებული. მას თანმხლები დაავადებებიც ჰქონდა.

ბოლო რამდენიმე დღის განმავლობაში ბათუმში კორონავირუსით მედპერსონალის გარდაცვალების მეოთხე შემთხვევა დაფიქსირდა.

„ჩვენს კლინიკაში ექიმი ილია ბერიძე შემოვიდა 14 ნოემბერს. ის იყო 73 წლის. ფილტვის დაზიანება ჰქონდა 22 ქულა, ეს ნიშნავს დაზიანებული იყო ფილტვის ქსოვილის 80%-ზე მეტი. მისი მდგომარეობა შემოსვლის დროს იყო მძიმე. ჰქონდა თანმხლები დაავადებებიც. გატარებული ღონისძიებების მიუხედავად მისი გადარჩენა ვერ მოხერხდა და დღეს დილით დაფიქსირდა გარდაცვალება.

ბატონი ილია მოქმედი ექიმი იყო. ამ ეტაპზე ჩვენთან მუშაობდა ოჯახის ექიმად და ასევე მუშაობდა კლინიკა „მედინაში“. გამოცდილი სპეციალისტი და დაფასებული პიროვნება იყო, თავისი საქმის პროფესიონალი“, – განაცხადა კლინიკა „მედცენტრის“ რეანიმაციის ხელმძღვანელმა ზვიად ბახტაძემ.

ავტორი: ნაირა ქობულაძე