დღეს ბათუმში ახალი ავტოსადგურის ტერიტორიაზე სამარშრუტო მიკროავტობუსების მძღოლების ნაწილმა საპროტესტო აქცია გამართა და არსებული მგზავრობის ტარიფის 20 თეთრით გაზრდა მოითხოვა. ხელვაჩაურის მიმართულებით მოძრავი 39, 49, 56 და 44  სამარშრუტო ხაზების მძღოლები აცხადებენ, რომ საწვავის გაძვირებამ და ბევრ ქუჩაზე ორმხრივი მოძრაობის აკრძალვამ მათი ყოველდღიური ხარჯები კიდევ უფრო გაზარდა.

მათივე განცხადებით, ბათუმის ყოფილი მერი ლაშა კომახიძე, შემდეგ კი მერის მოვალეობის შემსრულებელი არჩილ ჩიქოვანი მათ დაპირდა პირველ მარტამდე ამ საკითხის განხილვას, თუმცა დაპირება არ შესრულდა.

„ჩვენ ვითხოვთ ტარიფის 20 თეთრით გაძვირებას. დღის განმავლობაში მინიმუმ 50 ლარი საწვავს უნდა,  საგზურის გადასახადი, დღის განმავლობაში ჭამა ხომ გვინდა, მანქანას თავისი ხარჯი აქვს.  რა გვრჩება ჩვენ, სახლში რა წავიღოთ,  ოჯახები რითი ვარჩინოთ?
საგზურის გადასახადი 60 ლარი იყო, 90 გახდა. საწვავის ფასი ყოველ დღე იზრდება , 1.60 იყო და თითქმის სამ ლარამდეა ასული. ამას დაემატა ისიც, რომ ბევრი ქუჩა ცალმხრივი გახდა. ადრე თუ ხელვაჩაურიდან აქ ჩამოსვლამდე გვჭირდებოდა 35-37 წუთი, ახლა გვჭირდება თითქმის საათი და 10 წუთი. რამდენი მგზავრი უნდა გადავიყვანოთ 50 თეთრად, რომ თუნდაც საწვავის ხარჯი დავფაროთ.  მოგება არაფერი არ გვრჩება. ამას ემატება პანდემიის გამო არსებული რეგულაციები, მგზავრის ფეხზე დგომით გადაყვანა არ შეიძლება და არც წინა სავარძელზე განთავსება.  ვითხოვთ, 20 თეთრით მაინც გაიზარდოს მგზავრობის საფასური.  ასე მუშაობას აზრი არ აქვს“, – აცხადებს ერთ-ერთი მძღოლი, მერაბ ბერიძე.

აქციის მონაწილე მძღოლებმა  ბათუმის მერიასთან გადაინაცვლეს და მერის მოვალეობის შემსრულებელ არჩილ ჩიქოვანთან შეხვედრას ითხოვენ. კომპანია „აჭარტრანსრეგულირების“ ინფორმაციით, ტარიფების განსასაზღვრად მათ მიერ დაქირავებული აუდიტის სამსახურის მიერ შედგენილი დასკვნა ბათუმის საკრებულოში გადაგზავნილია და  ტარიფების მატება  თვის ბოლოს მოხდება და სავარაუდოდ,  70-80 თეთრით განისაზღვრება.

„დავიქირავეთ კერძო კომპანია, გაგვიკეთა დასკვნა, საბაზრო ღირებულებასთან დაკავშირებით ტარიფების შესახებ. მივმართეთ ბათუმის მერიას ამ დასკვნით. 6 გადამზიდავი კომპანიაა, რომელიც ქალაქში ემსახურება საქალაქო მარშუტებს. საკითხზე საკრებულო მსჯელობს და სავარაუდოდ მარტში იქნება ახალი ტარიფები.
განაცხადი თებერვალში შევიდა და სავარაუდოდ თვის ბოლოს იქნება გადაწყვეტილება. აუდიტის დასკვნაში ტარიფი განსაზღვრულია 70-80 თეთრით, ვნახოთ რა გადაწყვეტილებას მიიღებს საკრებულო“, -აცხადებს კომპანია „აჭარტრანსრეგულირების“ წარმომადგენელი.

ავტორი: ნაირა ქობულაძე