დღეს ბათუმში მაიაკოვსკის 55/17 ნომერში მცხოვრებმა მოქალაქეებმა ბენზინგასამართი სადგურის მშენებლობის შეჩერების მოთხოვნით აქცია გამართეს. როგორც ადგილობრივები აცხადებენ, ისინი არ დაუშვებენ ბენზინგასამართი სადგურის მშენებლობას და ყველა სამართლებრივ რესურსს გამოიყენებენ მშენებლობის შესაჩერებლად.
აქციის ერთ-ერთი მონაწილე მარი კაკაბაძე აცხადებს, რომ მშენებლობა კანონდარღვევით მიმდინარეობს და ამასთანავე საფრთხეს უქმნის ადგილობრივ მოსახლეობას.
„სადღაც ორი კვირის წინ დაიწყო აქ შემოღობვითი სამუშაოები, მოიტანეს მძიმე ტექნიკა და დაიწყეს მუშაობა. ჩვენთვის უცნობი იყო ვინ და რა კომპანია აშენებდა, რისი მშენებლობა მიმდინარეობდა ისიც არ იყო ჩვენთვის ცნობილი ამ დრომდე. დღეს გამოვიძახეთ ზედამხედველიბის სამსახური, გადაამოწმეს და რომელიღაც შპს აშენებს ბენზინგასამართ სადგურს და პროფილაქტიკას. სამართალდარღვევაა ის, რომ საინფორმაციო დაფაც არაა გამოკრული და ჩვენთვის უცნობი იყო რას აშენებდნენ. ამ ადგილას მრავალსართულიანი კორპუსი იყო, დაანგრიეს. ჩვენ მერიაში გვქონდა განცხადება შეტანილი, გვინდოდა აქ ბავშვებისთვის გასართობი პარკი მოეწყოთ. აქ ახლოსაა ნავთობგადასამუშავებელი ქარხანა, ისედაც მძიმე ეკოლოგიური სიტუაციაა, საწვავის მძაფრი სუნია და მოსახლეობას ეს გვაწუხებს. უბანში მომატებულია ონკოდაავადებათა რიცხვი და ჩვენ ვთვლით, რომ ესეც არის ერთი-ერთი განმაპირობებელი ფაქტორი. კანონით ბენზინგასამართი სადგური მოსახლეობისგან მნიშვნელოვნად უნდა იყოს დაშორებული. ამ შემთხვევაში კი 10 მეტრითაც არ არის დაშორებული. ჩვენ ვითხოვთ აიკრძალოს აღნიშნული მშენებლობა. ბენზინგასამართი სადგურის მშენებლობას არ შევეგუებით და ყველა სამართლებრივ რესურს გამოვიყენებთ იმისთვის, რომ აღნიშნული პროექტი არ განხორციელდეს“,- განაცხადა მარი კაკაბაძემ.
ავტორი: ნაირა ქობულაძე
