ინციდენტი მოხდა ბათუმის მესამე საჯარო სკოლის ტერიტორიაზე, სადაც უცნობი პირი სკოლის შენობაში შესვლას ცდილობდა. ადგილზე იმყოფებოდნენ სამართალდამცავები.
როგორც აჭარის რესურსცენტრის დირექტორი გოჩა დავითაძე „პრაიმტაიმთან“ აცხადებს, უცნობი პირი მხოლოდ შესასვლელ კარზე აკაკუნებდა და ძალით შეჭრის მცდელობას ადგილი არ ჰქონია.
„შეჭრას ცდილობდა, ეს არ შეესაბამება სიმართლეს. კარზე აკაკუნებდა. მანდატურმა შენიშვნა მისცა, უთხრა შეეწყვიტა კაკუნი და დაეტოვებინა ტერიტორია, თუმცა არ გაითვალისწინა. მანდატურმა გამოიძახა პოლიცია. სასწავლო პროცესი არ ჩაშლილა. ვინ იყო ეს პიროვნება არ ვიცი. პოლიციამ სკოლის ტერიტორიას განარიდა. შემდეგ რა მოხდა ვერ გეტყვით“, – განაცხადა გოჩა დავითაძემ.
შს სამინისტროს ინფორმაციით, პოლიცია გამოიძახეს პრევენციის მიზნით.
„შემოვიდა შეტყობინება სკოლიდან, პოლიცია პრევენციის მიზნით გამოიძახეს. დაუყოვნებლივ მივიდნენ კრიმინალური პოლიციის წარმომადგენლები.
ვატარებთ გასაუბრებას აღნიშნულ პიროვნებასთან. თუ კი გამოიკვეთება დანაშაულის ნიშნები, დაუყოვნებლივ მოყვება რეაგირება“, – აცხადებენ შს სამინისტროს პრესსამსახურში.
„პრაიმტაიმნიუსმა“ გაარკვია, რომ აღნიშნული პირი ამავე სკოლის ყოფილი მოსწავლეა, რომელიც მესამე საჯარო სკოლაში დაბრუნებას ითხოვდა.
მესამე საჯარო სკოლის დირექტორი იანა ჩადუნელი „პრაიმტაიმნიუსთან“ საუბრისას ადასტურებს რომ აღნიშნული პირი მათი ყოფილი მოსწავლეა.
„მანდატური აკონტროლებს სკოლაში შემოსასვლელ პერიმეტრს. უცნობი პირ, რა თქმა უნდა, ვერ შემოვა სკოლის ტერიტორიაზე. პანდემიიდან გამომდინარე, სკოლაში შემოსვლის უფლება მხოლოდ მოსწავლეებსა და თანამშრომლებს აქვთ. აღნიშნული პიროვნება ჩვენი ყოფილი მოსწავლეა, ოთხი წლის წინ გადავიდა სხვა სკოლაში.
დღეს იცოდა ვერ შემოვიდოდა კარიდან და გადმოძვრა ღობეზე. გაკვეთილზე ვიყავი, საკლასო ოთახის ფანჯრები სკოლის ეზოში გადის, დავინახე ბავშვი, პირბადე ეკეთა, ამ დროს მანდატური მიუახლოვდა, მაგრამ არ გაუჩერდა და სკოლის შენობისკენ გამოიქცა. ჩემს გაკვეთილზე სხვა მასწავლებელი შევუშვი და სასწრაფოდ გამოვედი. თავიდან ვიფიქრე ჩვენი ერთ-ერთი მოსწავლე იყო, მაგრამ აღმოჩნდა ჩვენი ყოფილი მოსწავლე. გამიკვირდა აქ რატომ იმყოფებიდა და არა თავის სკოლაში. ავუხსენი, რომ უნდა დაეტოვებინა სკოლის ტერიტორია, რა თქმა უნდა ძალიან მშვიდად და კორექტულად, მაგრამ არ მომისმინა არც მე და არც მანდატურს, დაიწყო სირბილი. მივხვდი, რომ უმართავი იყო პროცესი და მანდატურმა გამოიძახა პოლიცია.
რატომ მოიქცა ასე არ ვიცი, ვერ გეტყვით. დეტალები გაარკვიეთ მასთან. თქენს კითხვაზე, რომ ბავშვს ჩვენს სკოლაში უნდიდ დაბრუნება და ეს პირველი შემთხვევა არ არის სკოლაში შემოჭრის, გიპასუხებთ, რომ ჩემთვის არ არის ცნობილი. ვიცი, გადაიყვანეს სხვა სკოლაში მშობლება საკუთარი სურვილით“, – განაცხადა იანა ჩადუნელმა.
ავტორი: ნაირა ქობულაძე
