დღევანდელ განცხადებებში არც ერთი მოწოდება არ ყოფილა ძალადობისკენ. პირიქით, ეს იყო ახსნა იმ მოვლენების მთელი კასკადისა, რომელიც განხორციელდა ამ დღეებში, – ამის შესახებ საქართველოს იუსტიციის მინისტრმა რატი ბრეგაძემ მთავრობის ადმინისტრაციაში გამართულ ბრიფინგზე, ჟურნალისტების კითხვის საპასუხოდ აღნიშნა, რომელიც პრემიერ-მინისტრის დღევანდელ განცხადებას ეხებოდა.
ასევე მან აღნიშნა, რომ ის მოვლენები, რაც ბოლო დღეების განმავლობაში მიმდინარეობს ეს არის საქართველოს არაკეთილმოსურნის ინტერესებში და ეს არის რუსეთის ინტერესები.
„ასევე, მე მინდა ყურადღება გავამახვილო პრემიერის განცხადებიდან ერთ-ერთ მთავარ ამონარიდზე და ვფიქრობ, ეს არ უნდა გამოეპაროს არც საზოგადოებას და არც თქვენ. კერძოდ, აქ საუბარი იყო რუსულ კვალზე მთელ ამ მიმდინარე მოვლენებში. თუ დავაკვირდებით, რაც ხდება ბოლო დღეებში და ზოგადად, ამ პერიოდში, როგორც ყველას კარგად მოგეხსენებათ, 2024 წელს, საქართველო ემზადება იმისთვის, რომ ოფიციალურად გააკეთოს განაცხადი ევროკავშირში წევრობაზე. ასევე, საქართველო ძალიან ახლოს არის ნატოსთან და ჩვენს სტრატეგიულ პარტნიორებთან თანამშრომლობა არასდროს ყოფილა ისეთი მჭიდრო, როგორიც არის ახლა. მე შემიძლია თქვენც და საზოგადოებასაც დავუსვა იგივე შეკითხვა – ვის ინტერესებში შეიძლება შედიოდეს საქართველოს წარმოჩენა იმგვარად, თითქოს აქ არ ხდება ადამიანის უფლებების დაცვა, ასევე, შეტევის განხორციელება საპატრიარქოზე და არც ის უნდა დაგვავიწყდეს, რომ მათ შორის საქართველოს კონსტიტუციაში ძალიან ნათლად და მკაფიოდ არის ხაზგასმა მართლმადიდებლური ეკლესიის როლზე საქართველოს ისტორიაში. გისვამთ ყველას შეკითხვას – ვის ინტერესში შეიძლება შედიოდეს ეს ყველაფერი? აქვე გიპასუხებთ, რომ რა თქმა უნდა, ეს არის საქართველოს არაკეთილმოსურნის ინტერესებში და რა თქმა უნდა, ეს არის რუსეთის ინტერესები“, – აღნიშნა რატი ბრეგაძემ.
