პრემიერ-მინისტრის ირაკლი ღარიბაშვილის ინფორმაციით, 9 აგვისტოს უწყებათაშორისი საკოორდინაციო საბჭო გაიმართება, სადაც გარკვეული რეგულაციების შემოღების თაობაზე მსჯელობა გაიმართება.
მთავრობის მეთაურმა კიდევ ერთხელ მიმართა მოსახლეობას და იმუნიზაციის პროცესში ჩართვისკენ მოუწოდა.
ამასთან, ირაკლი ღარიბაშვილმა განმარტა თუ რატომ გააკეთა მან არჩევანი ფაიზერის ვაქცინაზე.
„ერთადერთი გამოსავალი ამ სიტუაციაში პანდემიის დასამარცხებლად არის ვაქცინაცია. მსოფლიომ გამოსცადა ყველაფერი, მათ შორის ლოკდაუნები, სრული ჩაკეტვები, რამაც ძალიან დიდი ზიანი მიაყენა ეკონომიკას. მთელ მსოფლიოში მილიონობით ადამიანი დარჩა უმუშევარი და ეკონომიკა დაინგრა.
ჩვენს მიერ გადადგმული ნაბიჯების შედეგად ეკონომიკის ძალიან სწრაფი აღდგენა მიმდინარეობს. შემოვიტანეთ 3 მლნ-ზე მეტი ვაქცინა, კიდევ ერთხელ მინდა მოსახლეობას განვუმარტო, რომ ჩაკეტვებით ეპიდემიას ვერ დავამარცხებთ. შეიძლება დროებით გავწელოთ პროცესი, პანდემიის დამარცხება შეგვიძლია მხოლოდ ვაქცინით.
ხვალ ვიმსჯელებთ გარკვეული რეგულაციების შემოტანაზე, როგორიც არის ნიღბების ტარება, მით უმეტეს აქტიურ საარჩევნო ფაზაში შევდივართ, უნდა გავითვალისწინოთ, რომ გარკვეული სტანდარტით ჩავატაროთ აღნიშნული არჩევნები.
რატომ ფაიზერი? ჩემი მეუღლე აიცრა სინოფარმის ვაქცინით, ახლა გვინდა, რომ ერთგვარი შეჯიბრი გავაკეთოთ სახლში, რომელს უფრო მეტი ძლიერი იმუნიტეტი ექნება. ოჯახის ყველა წევრი, მშობლები აცრილი მყავს. ყველაზე მთავარი არგუმენტი, რაც ვაქცინაციას უკავშირდება და ამ არგუმენტს პრაქტიკულად ვერავითარი კონტრარგუმენტი ვერ უპირისპირდება, ეს არის ის, რომ აცრა გვიცავს სიკვდილისგან“, – განაცხადა ირაკლი ღარიბაშვილმა.
