“არანაირი იმედი არ მაქვს იმისა, რომ “ქართული ოცნება” შეასრულებს დანაპირებს და მიიღებს ისეთ „საარჩევნო კოდექსს“, რომელიც საარჩევნო გარემოს მართლა გააუმჯობესებს. ამაზე მეტყველებს თუნდაც ის ცვლილებები, რომლებიც მიიღო 14 მაისს ცესკომ. ამის მიუხედავად, ჩვენი პოზიცია ხმამაღლა უნდა დავაფიქსიროთ”,- ამის შესახებ “ერთიანი საქართველოს” ლიდერმა ნინო ბურჯანაძემ ჟურნალისტებს სასტუმრო “იოტაში” განუცხადა, სადაც იმ ოპოზიციური პარტიების შეხვედრა მიმდინარეობს, რომლებმაც მიშელის დოკუმენტს ხელი არ მოაწერეს.
“ჯერ ერთი, პირველი შემთხვევაა საქართველოს დამოუკიდებლობის ისტორიაში, როდესაც ხელისუფლება საარჩევნო გარემოსთან დაკავშირებით, მხოლოდ ე.წ. საპარლამენტო პარტიებს ესაუბრება. ყველა დროს, მათ შორის, როდესაც მე ვიყავი პარლამენტის თავმჯდომარე ყოველთვის იყვნენ „საარჩევნო კოდექსზე“ მომუშავე ჯგუფში არასაპარლამენტო ოპოზიციის წარმომადგენლები. ეს მნიშვნელოვანია ახლაც, როდესაც არჩევნები გაყალბებულია და რეალურად არავინ იცის სინამდვილეში ვინ რამდენი პროცენტი მოიღო და ჩვენ, ნამდვილად ბარიერგადალახული პარტია გარეთ ვართ დარჩენილი.
ჩვენ დავაფიქსირებთ ჩვენს ძალიან მკვეთრ პოზიციას და იმედი მაქვს, რომ ე.წ. ხელმომწერი პარტიები ხმამაღლა გაახმოვანებენ მიშელის დოკუმენტის დარღვევას, რომ ხელისუფლება მართლაც ცდილობს „გააძვრინოს“ ვითომ რეფორმის საფარქვეშ თავისი ინტერესების გამომხატველი ნორმები. ასევე, ხმამაღლა ეტყვიან ჩვენი კოლეგები ბრიუსელს იმას, რომ რეალურად შეთანხმება არ სრულდება”, – აცხადებს ბურჯანაძე.
