„დაგეგმეთ მოგზაურობა ქვეყანაში, რომელიც პანდემიის დროს ხელშეუხებელი აღმოჩნდა“,- ბულგარეთის უმსხვილესი ინგლისურენოვანი სამოგზაურო ჟურნალი Vagabond საქართველოს, როგორც უსაფრთხო ტურისტული მიმართულების, შესახებ სტატიას აქვეყნებს.
საქართველო კულტურის, ბუნებისა და კვების ტურიზმის ახალი ვარსკვლავი გახდა. უძველესი ისტორიით,ოქროსფერი პლაჟებითა და მეგობრული ხალხით სავსე ქვეყანა ის ადგილია, რომელიც აუცილებლად უნდა აღმოაჩინოთ.
მთებისა და ტრადიციული სოფლების საოცარი პეიზაჟები, გემრიელი საკვები, შესანიშნავი ღვინო, ტრადიციული მუსიკა და ულამაზესი დედაქალაქი თბილისი, რომელიც ძველი და თანამედროვე არქიტექტურის არაჩვეულებრივი ნაზავია. მოგზაურობის მოყვარულებისთვის საქართველო ნამდვილად საოცარი ადგილია.
2020 წელს საქართველომ დაამტკიცა, რომ არაჩვეულებრივ ტურისტულ მიმართულებასთან ერთად უსაფრთხოც არის.
სანამ ყველაზე პოპულარული ტურისტული მიმართულებები Covid-19-ის გავრცელების შეკავებას ცდილობდნენ, საქართველომ სწრაფად იმოქმედა და უკვე იანვარში ვირუსის გავრცელების შესაჩერებლად სპეციალური ზომები მიიღო. შედეგად, ქვეყანაში Covid-19-ის ინფიცირების საგრძნობლად მცირე შემთხვევა დაფიქსირდა.
საქართველომ განსაკუთრებული ყურადღება მიაქცია ტურიზმის ინდუსტრიას. დაინერგა უსაფრთხოების აუცილებელი ინსტრუქციები. პანდემიის დროს 84 სასტუმროში 22 ათასზე მეტმა ადამიანმა 2 კვირიანი კარანტინი გაიარა. შედეგად, დაგროვდა უმნიშვნელოვანესი გამოცდილება, თუ როგორ უნდა იმუშაო ეფექტურად და უსაფრთხოდ ასეთ სიტუაციაში. ტურიზმის ინდუსტრიისთვის სპეციალური ეკონომიკური სტიმულირების პაკეტი მომზადდა.
ამ ყველაფრის შედეგად საქართველო მზად არის 1 ივლისიდან საზღვრები გახსნას. Covid-19-ის გავრცელების პრევენციის მიზნით, მკაცრი პროტოკოლები მომზადდა, რაც მოიცავს: სკრინინგს, დეზინფექციას და სპეციალურ ზომებს რესტორნებში, ტრანსპორტსა და სასტუმროებში.
საქართველოში სპეციალური მწვანე ზონები შეიქმნა, სადაც ტურისტებს უსაფრთხო, იზოლირებულ გარემოში შეუძლიათ დროის გატარება.
