„ჩვენ ძალიან დიდი სურვილი გვაქვს, რომ პატრიარქთან შეხვედრა მოვახერხოთ და გვინდა ამ ყველაფრის შესახებ მივაწოდოთ მას ინფორმაცია და გავიგოთ მისი დამოკიდებულება ჩვენს მიმართ.“ – ამის შესახებ დავით გარეჯის საქმეზე დაკავებული ივერი მელაშვილის მეუღლემ, თამარ მელაშვილმა განაცხადა.
მას სჯერა, რომ სასულიერო პირების უმეტესობას არ ექნება მათ მიმართ ის დამოკიდებულება, როგორიც აქვს მამა კირიონს.
„ზოგი ამბობს, რომ ეს არის ვითომ საპატრიარქოს დამოკიდებულება, მაგრამ მე არ მგონია ეს ასე იყოს, რადგან ისინი არიან სულიერი მამები და მათ კარგად იციან, რომ უდანაშაულო ადამიანის დადანაშაულება დიდი ცოდვაა და მე ეჭვი მეპარება, ბევრი სასულიერო პირი ფიქრობდეს ასე.
მგონია, რომ სულ ის ერთი-ორი ადამიანია, რომლებმაც რაღაც თავის შეცდომის თუ ვიღაცის დავალების გამო ასეთი რამ ჩაიდინეს და ასეთი ბრალი წაუყენეს.
მამა კირიონს უთქვამს, შეიძლება ფული ან რამე აიღოო, ფული რომ აგვეღო ხრუშოვკაში ვიცხოვრებდით, ამ პირობებში, რა პირობებშიც ვართ?! თვითონ კარგი ქონება ჰქონია, ეს გავიგე და ვინ იღებს ფულს დავალებებში, ეს კიდევ გასარკვევია და ეს უნდა იქით გამოიძიონ. მართალია სასულიერო მოღვაწეები არიან და სულ ვერიდები მათზე რამის თქმას, მაგრამ ყველგან ადამიანები არიან და ყველგან შეიძლება, მოხდეს რაღაც და იყოს ისეთი ადამიანი, რომელიც არ შეეფერება იმ ადგილს, სადაც არის. “- განაცხადა თამარ მელაშვილმა.
