საქართველოს საგარეო საქმეთა მინისტრი კომპანია „ფრონტერასთან“ დაკავშირებით მიღებულ გადაწყვეტილებას ეხმაურება. როგორც დავით ზალკალიანი ამბობს, მსგავსი ნაბიჯით საქართველომ დაამტკიცა, რომ აშშ-სთან პარტნიორობა ყველა მიმართულებით გამართლებულია.
„სახელმწიფოს მხრიდან აღნიშნული გადწყვეტილება იყო განპირობებული ქვეყნის სტრატეგიული ამოცანებით. საქართველოსთვის მნიშვნელოვანია ქვეყნის საინვესტიციო გარემოსთან დაკავშირებული საერთაშორისო რეპუტაცია, რომელიც მუდმივად იღებს უმაღლეს შეფასებებს და გამყარებული პოზიცია გვქონდა ჩვენ “ფრონტერასთან” მიმართებაში. აშშ-სთან ურთიერთობა ჩვენთვის არის ერთ-ერთი ფუნდამენტური საკითხი. აქედან გამომდინარე, ოფიციალურ დონეზე “ფრონტერასთან” დაკავშირებული საკითხი არასდროს ყოფილა განხილვის თემა და არ ჰქონია ისეთი დიდი მნიშვნელობა მინიჭებული, რომლის წარმოჩენასაც ცდილობდნენ ფრონტერას მესვეურები.
იმისთვის, რომ ჩვეულებრივი რუტინული დავა არ გამხდარიყო სახელმწიფოთა ურთიერთობის დამაზიანებელი, რისი მცდელობის ფაქტებიც იყო, ჩვენ ეს გადაწყვეტილება მივიღეთ. ეს იქნება კიდევ ერთი დადასტურება იმისა, რომ საქართველისთვის აშშ-სთან პარტნიორობა ყველა მიმართულებით არის გამართლებული“,- განაცხადა დავით ზალკალიანმა.
ცნობისთვის, მთავრობამ მიიღო გადაწყვეტილება, აღარ მოშალოს „ფრონტერა რისორსიზ ჯორჯია კორპორეიშენთან“ კონტრაქტი და შესაძლებლობა მისცეს კომპანიას საქმიანობა განაგრძოს. საუბარია სახელმწიფოს საძიებო ტერიტორიის დაახლოებით 1%-ზე, რადგან ამ ტერიტორიის დაახლოებით 99% „ფრონტერამ“ საარბიტრაჟო გადაწყვეტილების თანახმად, სახელმწიფოს უკვე დაუბრუნა.
