“დღეს ქართული ოპოზიციისგან პირველად მივიღეთ არჩევნების აღიარება, პირველად შეძლეს მათ თავის უახლოეს წარსულზე უარის თქმა. ისინი დაეთანხმნენ ერთ ფრაზას, რომელიც ერთ-ერთი განცხადებიდან გამოძებნეს, რომ „ლეგიტიმაციის ზღვარზე იყო არჩევნები“, დანარჩენი ყველა ოფიციალური განცხადება ევროპის, აშშ-ის მიუთითებდა, რომ ეს იყო კონკურენტული, სამართლიანი, თავისუფალი არჩევნები”,-  ამის შესახებ ფრაქცია „ქართული ოცნების” თავმჯდომარე მამუკა მდინარაძემ ჟურნალისტებთან განაცხადა.

“ოპოზიციამ თქვა, რომ იყო ლეგიტიმაციის ზღვარზე, ირიბად, ფრთხილად, მაგრამ მაინც აღიარეს. ამის გაგრძელება იყო ის, როცა თქვეს, რომ აზრი არ აქვს საგამოძიებო კომისიას. მათ არ გამოიყენეს ისეთი ბერკეტი, რომელიც 1-პროცენტიანი გადაცდომის შემთხვევაში „ქართული ოცნების“ სასარგებლოდ, ახალ არჩევნებს გულისხმობდა, რადგან თავადვე არიან დარწმუნებულნი, რომ გაყალბებული არჩევნები, ეს ცრუ ნარატივი იყო უპერსპექტივო. საგამოძიებო კომისიაში ამიტომ არ შემოდიან, ამიტომ ეწინააღმდეგებოდნენ დღეს ვადის გაგრძელებას, ამიტომ არ დაუჭირეს მხარი, რადგან დარწმუნებულები არიან, რომ არჩევნები არათუ ლეგიტიმური, არამედ კარგად არის ჩატარებული ამ ქვეყანაში,”- განაცხადა  მდინარაძემ.