„როგორც იქნა, ბევრი წვალების, შრომისა და შიდა პოლიტიკური დაპირისპირების შემდგომ ცვლილებები მიღებულია“,- ასე გამოეხმაურა თამარ ჩუგოშვილი დღეს საკონსტიტუციო ცვლიელებების მიღებას პარლამენტში.
როგორც იგი ამბობს, ყველა მთავარი მაინც ის რჩება, თუ როგორ ჩატარდება არჩევნები.
„მიუხედავად იმისა, რომ ოპოზიციის ნაწილი სხდომათა დარბაზში არ იყო, ამან შედეგზე გავლენა ვერ მოახდინა და საპარლამენტო არჩევნებს უკვე ახალი სისტემით ჩავატარებთ. მნიშვნელოვანია, ის ზიანი, რომელიც საერთაშორისო მიმართულებით, როგორც ქვეყანამ გასულ წელს და ნოემბერში მივიღეთ, ამის ნაწილობრივ ანაზღაურება და დაბალანსება მოხდეს. თუმცა, მთავარი იქნება, როგორ ჩატარდება არჩევნები, როგორი საარჩევნო გარემო იქნება, როგორ წარიმართება კენჭისყრის დღე.
დღევანდელი კენჭისყრა ვერ მოგვცემს საბაბს, მშვიდად ვიყოთ და ვთქვათ, რომ უკვე ყველაფერი გაკეთდა, მაგრამ ყოველ შემთხვევაში, ერთი ძალიან დიდი ნაბიჯი წინ გადაიდგა და მე ეს ძალიან მახარებს“, – აცხადებს თამარ ჩუგოშვილი.
დღეს საკანონმდებლო ორგანოში საკონსტიტუციო ცვლილებები მესამე მოსმენით დაამტკიცეს. კენჭისყრას „ნაციონალური მოძრაობა“ და „ევროპული საქართველო“ არ ესწრებოდნენ.
