ნინოწმინდის პანსიონის ახალი ხელმძღვანელის, მეუფე იაკობის თქმით, ნინოწმინდის პანსიონატთან დაკავშირებით, ატეხილი აჟიოტაჟი მალე დასრულდება.
„ეს არის ძალიან მოძველებული ფორმა. არ შეიძლება ასეთები რომ იყოს. ამიტომ მიდის ეს ცვლილებები. ჩვენს ქვეყანაში ბავშვებს ვერ ვუვლიდით. ახლა 2022 წლის 1-ელ აპრილამდე არის ლიცენზირებული ასეთი სასწავლებლები. ჩვენ ვფიქრობთ, რომ მანამდეც შევძლებთ უკვე (ცვლილებების დასრულებას). დიდი მადლობა ამ აჟიოტაჟისთვის. სწრაფად და ხარისხიანად შევცვლით ყველაფერს“, – განაცხადა მეუფე იაკობმა.
შეგახსენებთ, სახალხო დამცველსა და ნინოწმინდის პანსიონის ხელმძღვანელს შორის დღეს შეხვედრა გაიმართა. ნინო ლომჯარია და მეუფე იაკობი შეთანხმდნენ, რომ სავარაუდოდ მომავალი კვირის ბოლოს პანსიონში ერთად ჩავლენ.
