19 წლის ფეხბურთელის, გიორგი შაქარაშვილის გარდაცვალების შესახებ, საფეხბურთო კლუბ „საბურთალოს“ პრეზიდენტმა ისაუბრა.
ტარიელ ხეჩიკაშვილმა ახალგაზრდა ფეხბურთელი დადებითად დაახასიათა და განაცხადა, რომ მისი გარდაცვალება მთელი ქვეყნისთვის ტრაგედიის ტოლფასია.
„ძალიან დიდი ტრაგედიაა. სიცოცხლით სავსე, ძალიან ზრდილობიანი და ნიჭიერი ახალგაზრდა ფეხბურთელი გამოაკლდა ქვეყანას, ჩვენს გუნდს და მის ოჯახს. ძალიან დიდია ეს ტკივილი. ყველასათვის ცნობილია, რომ „საბურთალო“ არის ერთი დიდი შეკრული ოჯახი და თითოეულ მათგანს როგორც საკუთარ შვილებს, ისე ვზრდით. ძალიან მიჭირს ამაზე საუბარი. დღეს ბოლო იმედს კიდევ ვაჟღერებდი პირდაპირ ეთერში და გიორგისაც მივმართე, რომ გამოჩენილიყო და ეს ბოლო იმედიც ჩაქრა. ერთადერთი ის დაგვრჩა, რომ მისი ოჯახი ვანუგეშოთ, ჩვენ კი ლოცვებში მოვიხსენიოთ“, – განაცხადა ხეჩიკაშვილმა.
„საბურთალოს“ პრეზიდენტმა მოსახლეობას და განსაკუთრებით მშობლებს მოუწოდა, რომ ბავშვები კონფლიქტებს და აგრესიას მაქსიმალურად მოარიდონ, რადგან სამომავლოდ ეს მათ ფსიქიკაზე უარყოფითად აისახება.
„მთავარი საქმე ის არის, რომ სწორი დასკვნები და გაკვეთილი გამოვიტანოთ თითოეულმა ჩვენგანმა, განსაკუთრებით უფროსმა თაობამ, მშობლებმა. დავფიქრდეთ, ხომ არ მიგვიძღვის თითოეულ ჩვენგანს გარკვეული წვლილი იმაში, რომ ჩვენი შვილები ერთმანეთის მიმართ ასეთი აგრესიულები არიან და ფაქტობრივად უმიზეზოდ, ასეთ უბედურ შემთხვევებთან გვაქვს საქმე. ის გაუთავებელი აგრესია, რომელიც მოდის ყოველდღიურად, მათ შორის ჩვენი თაობისგან, ეს ყველაფერი აისახება ახალგაზრდებზე და ისინიც ერთმანეთის მიმართ ნაკლებად მიმტევებლები არიან. ეს აისახება მათ ქცევაშიც და ვიღებთ ასეთ შედეგებს. ალბათ სწორი დასკვნები უნდა გავაკეთოთ ამისგან, რომ მერე ერთმანეთს გავუფრთხილდეთ და შვილებიც ისე უნდა აღვზარდოთ, რომ ერთმანეთთან სიყვარული უფრო მეტი ჰქონდეთ, ვიდრე ქიშპი.
ხეჩიკაშვილმა ასევე განაცხადა, რომ გიორგი შაქარაშვილი ახალგაზრდებს შორის განვითარებულ კონფლიქტში ჩართული არ ყოფილა.
ერთი რამ ცალსახაა და ამას იქ დაპირისპირებული ახალგაზრდებიც აღიარებენ, რომ თვითონ გიორგი იმ კონფლიქტში არ მონაწილეობდა. საერთოდ, მინდა ვთქვა, რომ ის იყო უნიჭიერესი ბავშვი, უკონფლიქტო და უსაყვარლესი ადამიანი. კარგი დედის და მამის გაზრდილი შვილი და უფრო მეტად დასანანია, როდესაც ასეთ შვილებს ვკარგავთ“, – განაცხადა „საბურთალოს“ პრეზიდენტმა „მთავარი არხის“ ეთერში.
შეგახსენებთ, რომ 4-დღიანი ძებნის შემდეგ, „საბურთალოს“ 19 წლის ფეხბურთელი გიორგი შაქარაშვილი წყალში გარდაცვლილი იპოვეს.
