ბოდბელმა ეპისკოპოსმა იაკობმა მარიამობას ქალების როლზე იქადაგა და აღნიშნა, რომ პარლამენტში ქალთა კვოტირებაზე საუბარი, შეურაცხმყოფელია. ხოლო ტერმინის „სუსტი სქესის” გამოყენება შეცდომაა.
„ქალს აქვს საოცრად მოსიყვარულე გული და საოცარი ერთგულება, ეს ის თვისებებია, რომლისკენაც ყველა უნდა ვისწრაფოდეთ. მით უმეტეს ასეთი არეულობის ჟამს, თან დაპაუზებულია მსოფლიო, ამიტომ აუცილებელია იმ სიყვარულით ვიყოთ სავსე, როგორიც აქვს ქალს. შეცდომით ეძახიან ხოლმე სუსტ სქესს.
თანასწორია მამაკაციც და ქალიც. კაცს გონება სხვანაირად აქვს, თორემ იმას კი არ ვამბობ, რომ კაცი უფრო ნიჭიერია ქალზე. უფრო მასში მეტად გონება მოქმედებს, ქალში მოქმედებს გული. ამიტომაც გონიერ გულზე რომ არის საუბარი. ადამიანი მაშინ აღწევს ღმერთთან სიახლოვეს, როცა გონიერი გული აქვს და მიჰყვება.
განსაკუთრებით გილოცავთ ქალბატონებს, კიდევ ერთხელ, მსოფლიოში ხომ ხედავთ რა მოძრაობებია ახლა, ქალთა თანასწორობები. საქართველოში კიდე ყოველთვის ქალს თავისი ადგილი ჰქონდა. ქალს მეფესაც ვუწოდებდით, როცა იმსახურებდა.
დღეს მიდის ხოლმე რაღაც კვოტებზე საუბარი. როგორ შეიძლება ქალებს კვოტები დავუწესოთ. ეგ არის დამცირება ქალების. თუ ღირსი ხარ, შეიძლება კაცი სულაც არ იყოს, არც პარლამენტში, არც პრეზიდენტად, არც პრემიერად და მარტო ქალები იყვნენ, თუ ღირსები არიან. რატომ რაღაც პროცენტი, რატომ მესამედი, ან ნახევარი?
როცა ღირსებას შეეხება, მდიდრებს ხომ არ ვირჩევთ, რომ ყოველი მესამე ქალი იყოს მდიდარი, ან ყოველი მესამე ღარიბი. ვისაც რა შეუძლია უნდა დაიმკვიდროს. ასე შეფარვით, ვითომ ვიცავთ ქალებს. ეს ჩემი აზრით, დიდი შეურაცხყოფაა. ჩვენ ოჯახში ვიზრდებოდით, ახალგაზრდები იზრდებიან.
შეიძლება რაღაც გაუგებრობები იყოს ოჯახში, მაგრამ ყოველთვის კარგს ვასწავლით, მაგალითებითაც. დედის სიყვარული ვინ უნდა დაუშალოს ბავშვს, მით უმეტეს შეხედეთ, კაცებს არ ჰქონდათ იმისი დრო, რომ გაეზარდათ, ქალბატონები ზრდიდნენ ვაჟკაცებად.
კაცები ან სულ შრომობდნენ გარეთ, ასე ვთქვათ, საგარეო საქმეთა მინისტრები იყვნენ, ან კიდევ მტერთან იბრძოდნენ, გარეთ იყვნენ. ქალები საშინაო საქმეებს აგვარებდნენ და სახელმწიფოს თაობებს უზრდიდნენ. საუკეთესო თაობები გვყავდა და მიუხედავად იმისა, რომ ხან ვის ვყავდით დაპყრობილი და ხან – ვის, ჩვენი სული ვერ გატეხეს.
ჩვენ ღირსეული წინაპრების ღირსეული შთამომავლები ვართ და მსოფლიოს ქალებთან მიმართებაში, ვუსწრებთ- ხოლმე. ტელევიზიებით ხშირად იმასაც ვაჩვენებთ, რომ ქალებს ვჩაგრავთ, მაგრამ ცუდი საქციელი ყველგან შეიძლება მოხდეს და გამართლება არ აქვს ცუდ საქციელს.
მთავარია, თქვენ არ დაიჯეროთ, რომ ჩაგრულები ხართ, თქვენ ხართ თავისუფალი ადამიანები, რომლებიც თავისუფლებისმოყვარე შვილებს ზრდით და სუფთად რომ დავდივართ, წესიერად რომ გამოვიყურებით, ეს არის უშუალოდ ქალების დამსახურება და თქვენ განსაკუთრებული ადგილი გაქვთ ამ ქვეყანაზე. აღმატებული ხართ ბევრზე” – ბრძანა ეპისკოპოსმა.
ავტორი: ხათუნა გულიაშვილი
