მცხეთაში 18 ივნისის წვეულების მასპინძლის, ანა გაბეჩავას გამოკითხვა მცხეთის პოლიციაში დასრულდა.

„აბსოლუტურად ყველაფრის გარშემო იყო შეკითხვა, მათ შორის შაქარაშვილის საქმეზეც. მოგვიანებით გავაკეთებთ კომენტარს. ძალიან ბევრი კითხვა იყო, რა თქმა უნდა, სხვაგვარად ამდენ ხანს არ გავჩერდებოდით“, – განაცხადა ადვოკატმა, ლიკა ბითაძემ.

ამასთან, როგორც მეორე ადვოკატმა, თათია მანეჟაშვილმა ჟურნალისტებთან კომენტარისას აღნიშნა, შესაძლოა, გამოკითხა რამდენჯერმე გახდეს საჭირო.

„შესაძლებელია, რამდენჯერმე გახდეს საჭირო გამოკითხვა, თუ რაიმეს დაზუსტება იქნება საჭირო. თუმცა, გეტყვით, რომ მითითებული განცხადების საფუძველზე მოხდა ოქმის შედგენა. დეტალებზე მოგვიანებით გავაკეთებთ კომენტარს“,- განაცხადა ადვოკატმა.

ანა გაბეჩავამ ჟურნალისტებთან კომენტარი არ გააკეთა.

შეგახსენებთ, რომ 19 წლის ფეხბურთელი 18 ივნისს სწორედ ანა გაბეჩავას დაბადების დღის წვეულებაზე იმყოფებოდა, სადაც ახალგაზრდებს შორის კონფლიქტი მოხდა.

გიორგი შაქარაშვილის დაკარგვის შესახებ ოჯახმა სამართალდამცავ ორგანოებს 19 ივნისს 11:00 საათზე მიმართეს. 4-დღიანი სამძებრო სამუშაოების შემდეგ კი ფეხბურთელი მდინარე არაგვში გარდაცვლილი იპოვეს.

გიორგი შაქარაშვილის გარდაცვალების საქმეზე სამართალდამცველებმა 17 პირი დააკავეს. სასამართლომ ყველა მათგანს აღკვეთი ღონისძიების სახით წინასწარი პატიმრობა შეუფარდა.