კოვიდპანდემიის გამო დაწესებული შეზღუდვების პროტესტის ნიშნად ქუთაისის ბარ-რესტორნებმა მიტანის სერვისი ერთი დღით შეაჩერეს.
კაფე-ბარ „პალატში“, „საფერე“ და „დებში“, ამბობენ, რომ ისინი გაკოტრების პირას არიან.
„პალატის“ დირექტორი ზურაბ ფანჯარაძე ამბობს, რომ მათ სახელმწიფოს მხრიდან რაიმე შეღავათებით არ უსარგებლიათ და კოვიდკრიზისთან გამკლავება თავად უწევთ.
„ერთადერთი რაც შეგვეხო ეს არის თანამშრომლებისთვის ერთჯერადი 300 ლარიანი და 200 ლარიანი დახმარებები. ჩვენს სექტორში ითქვა, რომ რესტორნების 70 პროცენტი დაიკეტებოდა და მგონი აქეთკენ მივდივართ. ჩვენ ახლა ვმუშაობთ, მაგრამ ვმუშაობთ იმისთვის, რომ მომხმარებელი არ დავკარგოთ და ცნობადობა შევინარჩუნოთ. გატანის სერვისი ფაქტობრივად არაფერია. კომპანიები, ვინც მიტანის სერვისს უზრუნველყოფენ ფაქტობრივად წილში გვყავს. ისინი სახელმწიფო ბიუჯეტში თანხებს არ იხდიან. ამის შესახებ ვაცნობეთ მთავრობას, მაგრამ შედეგი არაფერია. ბანკებთანაც რთულია მოლაპარაკება და ვალდებულებების გადავადება. ამიტომ ვუერთდებით ბოიკოტს”,- ამბობს ზურაბ ფანჯარაძე.
ქვეყნის მასშტაბით 200- ზე მეტმა ბარ_რესტორანმა მიტანის სერვისი ერთი დღით შეაჩერა.
ავტორი: კესო მოლაშხია
