ხმაური და დაპირისპირება იყო ბათუმში წერეთლის ქუჩაზე, სანაპიროს მიმდებარე ტერიტორიაზე, თევზით მოვაჭრეებსა და ადგილობრივ მოსახლეობას შორის. ქაფშით მივაჭრეების წინააღმდეგ ადგილობრივმა მოსახლეობამ და მიმდებარე კომერციული ობიექტების მეპატრონეებმა აქცია გამართეს და მოვაჭრეებს დახლების დადგმის საშუალებას არ აძლევდნენ.
როგორც აქციის მონაწილეები აცხადებენ, უნდა აიკრძალოს ქუჩაში თევზით ვაჭრობა, რადგან ანტისანიტარია და აუტანელი სუნია ირგვლივ.
„აქ ცხოვრება შეუძლებელია. ყოველ დღე გვიწევს აუტანელი სუნის და ანტისანიტარიის პირობებში ცხოვრება. არ მივცემთ დახლების დალაგების საშუალებას. გადაიყვანონ ეს ხალხი სხვა ადგილას. კი გვესმის უჭირს ყველას, მაგრამ ჩვენ რა დავაშავეთ? არაერთხელ მივმართეთ მერიას და მუნიციპალურ ინსპექციას, რამდენჯერმე აალაგეს დახლები და აუკრძალეს აქ ვაჭრობა, მაგრამ გარევაჭრობა მაინც გრძელდება“, – აცხადებს აქციის ერთ-ერთი მონაწილე ზაზა ბოლქვაძე.
ქაფშიით მოვაჭრეები კი აცხადებენ, რომ ალტერნატიული ტერიტორია, რომელსაც სავაჭროდ სთავაზობენ, მათთვის მიუღებელია, რადგან დიდი გადასახადია და იქ მოსახლეობა არ დადის.
„არ გვიხარია ქუჩაში ჯდომა და ვაჭრობა, მაგრა სხვა გზა არ გვაქვს. ეს არის ჩვენი შემოსავლის ერთადერთი წყარო. ისეც გაჭირვებული ვიყავით და ამ პანდემიის და აკრძალვების გამო ულუკმაპუროდ დავრჩით. გვესმის აქ მაცხოვრებელი ხალხის, ვიცით სუნია, ჩვენს არ გვსიამოვნებს ეს სუნი, მაგრამ ჩვენიც გაიგონ. აქედან რომ წავიდეთ, შიმშილით უნდა მოვკვდეთ. ბაზარში შედით და ივაჭრეთო. იქ არავინ დადის, პროდუქციის რეალიზაციას ვერ მოვახერხებთ და გადასახადებიც დიდი“, – აცხადებს გარემოვაჭრე.
ადგილზე მობილიზებული იყვნენ სამართალდამცველები.
როგორც მუნიციპალურ ინსპექციაში „პრაიმტაიმნიუსს” უთხრეს, ბაზარში გადასვლის შემთხვევაში ტარიფის დაკლებასთან დაკავშირებით მიმდინარეობს მოლაპარაკება მოვაჭრეებთან და გადასახადის შემცირებაზე უშუამდგომლებენ.
ავტორი: ნაირა ქობულაძე
