ქვეყანაში საგრძნობლად გაზრდილია „პისიარ“ ტესტირების მაჩვენებელი. დღევანდელი რიცხვით, უკვე ნახევარ მილიონს გადააჭარბა, ანუ იანვრიდან მოყოლებული 508 ათასი „პისიარ“ ტესტია ქვეყანაში, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ მთავრობის ადმინისტრაციაში განაცხადა.
მისივე თქმით, ქვეყნის ჯანდაცვის სისტემა კორონავირუსით ინფიცირებული ადამიანებს ადრეულ ეტაპზევე ავლენს, რის შედეგადაც ძირითადად, ინფიცირების მსუბუქი შემთხვევებია.
„მილიონ მოსახლეზე ჩვენ გვაქვს 136 818 ტესტი, რაც გახლავთ ერთ-ერთი კარგი მაჩვენებელი. ევროკავშირის ქვეყნებს შორის ჩვენ სადღაც შუა ხაზზე ვართ. ეს ნიშნავს, რომ გაფართოებული ტესტირების დროს, დილისთვის 11 ათასამდე ტესტირება გვქონდა. შეიძლება ითქვას, რომ ადრეულ ეტაპზე ინფექცია თითქმის არ გვეპარება და ამიტომაც ეს ერთ-ერთი მიზეზია იმისა, რომ ძირითადად მსუბუქი შემთხვევებია. ინფიცირებულებს ადრეულ ეტაპზევე ვავლენთ და ვიწყებთ მათ მართვას, რაც სწორედ გამოსავლის კარგი წინაპირობაა“, – განაცხადა ამირან გამყრელიძემ.
