„გახარიას გადადგომა იყო პასუხისმგებლობის თავიდან აცილება. მან ხელები შეაწმინდა კობახიძეს და ბიძინა ივანიშვილს და ასევე მან მიანიშნა, რომ გავრილოვის ღამეც მისი ბრალი არ იყო. ასე რომ, უმწვავესი პოლიტიკური კრიზისია და ვადამდელი რიგგარეშე არჩევნები არის მნიშვნელოვანი. ჯერ ვნახოთ „ქართული ოცნება“ ამაზე რას იტყვის“, – ამის შესახებ „ნაციონალური მოძრაობის“ წევრმა ხატია დეკანოიძემ განაცხადა.
მისივე თქმით, ჯერ ოპოზიცია მმართველი გუნდისგან კონკრეტულ წინადადებებს ელოდება.
დღეს, პრემიერმინისტრი გიორგი გახარია, თანამდებობიდან გადადგა. პრემიერმა ეს გადაწყვეტილება ნიკა მელიას საქმეს დაუკავშირდა.
გიორგი გახარიას თქმით, მისი ურყევი პოზიციაა, რომ “ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ეკალაციის შესაძლებლობას, არის მიუღებელი”.
შინაგან საქმეთა სამინისტრომ ნიკანორ მელიას საქმეზე დაგეგმილი ღონისძიება დროებით გადადო.
