გიორგი ვაშაძეს მისი პარტიის რეიტინგი პრემიერ-მინისტრობის ამბიციების საშუალებას არ უნდა აძლევდეს, – ასე გამოეხმაურა „ნაციონალური მოძრაობის“ ერთ-ერთი ლიდერი ხატია დეკანოიძე მოძრაობა „სტრატეგია აღმაშენებლის“ ლიდერის, გიორგი ვაშაძის განცხადებას იმის შესახებ, რომ ის პროდასავლური კოალიციის პრემიერ-მინისტრობის კანდიდატობას აპირებს.
„მინდა, გიორგი ვაშაძეს ერთი რამ ვურჩიო – საკუთარი ამომრჩევლის ნების პატივისცემა ძალიან მნიშვნელოვანია. ვინ იქნება მთავრობაში, ეს არის ამომრჩევლის, და არა კონკრეტული პოლიტიკური ფიგურების გადასაწყვეტი. შესაბამისად, ასეთი განცხადებები კონტექსტიდან ამოვარდნილია. თუ ბოლო კვლევებს გადავხედავთ, გიორგის მისი პარტიის რეიტინგი ამის აფიშირების და ამბიციების საშუალებას არ უნდა აძლევდეს. მთავარია, ყველა პოლიტიკურმა ლიდერმა პატივი სცეს ამომრჩეველს. ვფიქრობ, ჩვენი ამომრჩევლის გადაწყვეტილების შემდეგ, ყველაფერი თავის ადგილას დადგება. ამიტომ მე ზედმეტადაც მიმაჩნია ახლა რაიმე სახის მთავრობაზე საუბარი“, – განაცხადა დეკანოიძემ.
რამდენიმე დღის წინ ექს-პრეზიდენტმა მიხეილ სააკაშვილმა განაცხადა, რომ გიორგი ვაშაძე ბნელ მხარეზე გადავიდა. დღეს კი ვაშაძემ აღნიშნა, რომ აპირებს, პროდასავლური კოალიციის პრემიერ-მინისტრობის კანდიდატი იყოს.
საქართველოში საპარლამენტო არჩევნები 31 ოქტომბერს ჩატარდება.
