ბელარუსის დედაქალაქ მინსკში, თავისუფლების მოედანზე ოპოზიციის საკოორდინაციო საბჭოს მიერ ორგანიზებული მიტინგი მიმდინარეობს, რომელზეც დაახლოებით, 100 000 ადამიანი იმყოფება.
„მარში ახალი ბელარუსისთვის“, ასე ჰქვია მორიგ ხალხმრავალ მიტინგს, რომელიც 9 აგვისტოს პრეზიდენტობის არჩევნების ფალსიფიცირებული შედეგების გაუქმებისა და ახალი თავისუფალი არჩევნების დანიშვნის მოთხოვნით ტარდება.
აქციის დაწყებამდე, შეკრებილებმა წუთიერი დუმილით პატივი მიაგეს საპროტესტო აქციის დროს, მილიციის მიერ ძალის გადამეტების შედეგად დაღუპულთა ხსოვნას.
9-11 აგვისტოს მოვლენების შედეგად ბელარუსში 4 ადამიანი დაიღუპა.
აქციების სასტიკად დარბევის შემდეგ სამართალდამცველებმა დააკავეს 7 000-მდე ადამიანი. მომდევნო დღეებში კი ყველა დაკავებული გაათავისუფლეს.
