„მე იმედი მაქვს, რომ გაივლის ეს განსაცდელი , ამაზე უამრავი ადამინი ფიქრობს, მუშაობს სპეციალისტები და მჯერა, როგორც დღემდე ბევრი რამ დაძლეულა, დაიძლევა ესეც“,- ამის შესახებ ფოთისა და ხობის მიტროპოლიტმა, მეუფე გრიგოლმა საკათედრო ტაძარში საკვირაო წირვის დასრულების შემდეგ ჟურნალისტებს განუცხადა.
მისი თქმით, ამ ეტაპზე ღვთისმსახურების წესში ცვლილებების შეტანა არ იგეგმება. მეუფე იმედს გამოთქვამს, რომ ეს განსაცდელი მალე გაივლის.
„ჩვენ რაც დადგენილი არის ვცდილობთ სწორედ ის ნორმები შევასრულოთ, უსაფრთხოება მაქვს მხედველობაში. აგერ შემოდგომაც გავიდა და ზამთარი დადგა და ხედავთ, რომ ადამიანები იღუპებიან და ეს არ არის ისეთი მოვლენა , რომელზეც შეიძლება ადამიანმა არასერიოზულად ისაუბროს და რაღაც ზღაპრები მოყვეს. ყველას აქვს უფლება თავისი აზრი ჰქონდეს , მაგრამ ფაქტია, რომ არაერთი ადამინის სიცოცხლე იმსხვერპლა და ეს არაერთი არ არის ორი, ათი და ასი, უამრავი ადამიანი . თუმცა მე იმედი მაქვს, რომ გაივლის ეს განსაცდელი, გაივლის აუცილებლად. ამაზე უამრავი ადამინი ფიქრობს , მუშაობენ სპეციალისტები და მჯერა , როგორც დღემდე ბევრი რამ დაძლეულა, ესეც დაიძლევა. ოღონდ საჭირო არის საერთო ძალისხმევა და გათვალისწინება ამ საფრთხეებისა ,“- განაცხადა მეუფე გრიგოლმა.
მეუფე გრიგოლის თქმით, ღვთისმსახურების წესში ცვლილებების შეტანის აუცილებლობის შემთხვევაში, საკითხზე იმსჯელებენ და სპეციალისების რეკომენდაციებს გაითვალისწინებენ. მისივე თქმით, ამჟამად ეპარქიაში შემავალ ყველა ტაძარში წირვა-ლოცვა რეგულაციით გათვალისწინებული ყველა წესის დაცვით მიმდინარეობს.
„ღვთისმსახურების დროსაც კი სასულიერო პირები პირბადეებით დგანან. ასევე მრევლი. ამ ეტაპზე მეტი რა უნდა გავაკეთოთ, ვერ გეტყვით. ვნახოთ, ცხოვრება ხომ იცით, როგორი არის, გვიჩვენებს. სასულიერო პირები ზოგი იზოლაციაშია სიფრთხილის გამო, ზოგი დაავადებულია, ინფიცირებულია და ზოგიერთ ადგილებში ღვთისმსახურების ჩატარების პრობლემაა, რადგან სასულიერო პირი ინფიცირებულია. სხვაგანაც ვიცი, იგივე ევროპის ქვეყნებში, რა მდგომარეობაც არის. ადამიანს შეიძლება ყველაფერი აუკრძალო, მაგრამ ლოცვას ვერავის აუკრძალავ“,- განაცხადა მეუფე გრიგოლმა.
