საქართველოს სახალხო დამცველმა ნინო ლომჯარიამ პარლამენტის სესიაზე ვაქცინაციის საკითხზე ისაუბრა და თქვა, რომ ქვეყანაში ვაქცინის ნაკლებობა შეიძლება, შეფასდეს სახელმწიფოს მხრიდან ადამიანის ჯანმრთელობისა და სიცოცხლის უფლების დარღვევად.
ომბუდსმენი ვაქცინაციასა და ზოგადად კოვიდის მართვასთან დაკავშირებით არსებულ მდგომარეობას კრიტიკულად აფასებს და მიიჩნევს, რომ ეს საკითხი, მათ შორის მოქალაქეების მხრიდან, გასაჩივრების საფუძველი გახდება.
“შექმნილ მდგომარეობას ძალიან კრტიკულად მივიჩნევთ. იმ ვითარებაში, როდესაც ვაქცინა დღეს არის ერთ-ერთი უმნიშვნელოვანესი საშუალება, რომელიც ადამიანებს იცავს მძიმე დაავადებისა და სიკვდილისგან და, როდესაც ქვეყანაში დღეს ვაქცინა არ გვაქვს, რა თქმა უნდა, ეს შეიძლება შეფასდეს, როგორც სახელმწიფოს მხრიდან ჯანმრთელობის და სიცოცხლის უფლების დარღვევა. ამდენად, ამ მიმართულებით ძალიან კრიტიკული ვიქნებოდი“,- თქვა ლომჯარიამ.
ლომჯარიას შეფასებას ჯანმრთელობისა და სოციალური დაცვის კომიტეტის თავმჯდომარემ, დიმიტრი ხუნდაძემ უსამართლო და მძიმე ბრალდება უწოდა.
დიმიტრი ხუნდაძის თქმით, მართლაც უფრო აქტიური უნდა იყოს ვაქცინაციის პროცესი და უფრო მეტად დაცული თითოეული მოქალაქის ჯანმრთელობა. მაგრამ “სიცოცხლის უფლების დარღვევის ბრალდება შეიძლება წავუყენოთ მაშინ, როდესაც პაციენტს, ანუ დაავადებულ ადამიანს არ მკურნალობენ ან არასწორად მკურნალობენ”. ეს კი, მისივე თქმით, ქვეყანაში არ ხდება და ვაქცინების ნაკლებობა მთელ მსოფლიოშია და მათ შორის, წამყვან და ძლიერ ქვეყნებში.
