თბილისში, უნივერსიტეტის ქუჩაზე გარე გაყიდვების აკრძალვის მიუხედავად ყვავილების ვაჭრობით დასაქმებულებმა მუშაობა განაახლეს.
ყვავილების გამყიდველები პანდემიის გამო დაწესებულ შეღუდვებს აპროტესტებენ და საკუთარ გადაწყვეტილებას მძიმე ეკონომიკური მდგომარეობით ხსნიან.
ხელისუფლების წარმომადგენლები მათ ონლაინ რეჟიმზე გადასვლისკენ მოუწოდებენ, ყვავილების გამყიდველები კი მუშაობის გაგრძელების უფლებას ითხოვენ.
ჯანდაცვის სამინისტროს შრომის პირობების ინსპექტირების დეპარტამენტის უფროსი, ბექა ფერაძე აცხადებს, რომ ეპიდსიტუაციიდან გამომდინარე მსგავსი შეზღუდვები მიზანშეწონილია და ყვავილების გამყიდველები სამართალდამცავებს უნდა დაემორჩილონ.
“შეზღუდვაა და არა აკრძალვა, რაც იმას ნიშნავს, რომ მათ დისტანციურად ონლაინ შეუძლიათ მუშაობის გაგრძელება. ეპიდსიტუაციიდან გამომდინარე მიზანშეწონილია მსგავსი ტიპის შეზღუდვები,”- განაცხადა ბექა ფერაძემ.
