საქმის მასალების დეტალური შესწავლით, შემთხვევის ადგილზე დამატებითი გასვლის რეჟიმში ექსპერტთა კომისიის წევრები მივედით ერთობლივ გადაწყვეტილებამდე და აზრთა სხვადასხვაობას ამ ეტაპზე ადგილი არ ჰქონია – ცალსახად დადგინდა, რომ შაქარაშვილი ამ დაზიანებებს ხიდიდან ჩამოვარდნით და წყალში დაცემით ვერ მიიღებდა, – ამის შესახებ დამოუკიდებელი საექსპერტო ცენტრ „ვექტორის“ დირექტორმა, ალექსანდრე გეჯაძემ განაცხადა.
„შაქარაშვილის გარდაცვალების ფაქტთან დაკავშირებით ჩატარდა სასამართლო-სამედიცინო ექსპერტიზა. მაშინ ექსპერტიზას უნდა დაედგინა, თუ რა გახდა გარდაცვალების მიზეზი, რა დაზიანებები ჰქონდა გვამს და სიმთვრალე-სიფხლიზლის საკითხები. ამაზე ცალსახად გაიცა ექსპერტიზის დასკვნა, რომელშიც მონაწილეობდა ჩვენი ცენტრის წარმომადგენელი კახა ერისთავი და ეს ინფორმაცია საზოგადოებისთვის ცნობილია. ამ ეტაპზე დასრულდა შაქარაშვილის გარდაცვალების ფაქტთან დაკავშირებით ჩატარებული მეორე სასამართლო-სამედიცინო ექსპერტიზის ნაწილი, რამეთუ 14 შეკითხვიდან, რომელიც 14 ივლისის დადგენილებით გამოძიებამ დანიშნა სამხარაულის საექსპერტო დაწესებულებაში, ამ ეტაპზე პასუხი გაეცა მხოლოდ 8 შეკითხვაზე, რომლებიც ძირითადად ეხება დაზიანებების განვითარების შესაძლებელ ვარიანტებს. ამ ექსპერტიზაში მონაწილეობს ჩვენი ცენტრის 2 ექსპერტი – მე და კახა ერისთავი, და სამხარაულის საექსპერტო დაწესებულების ექსპერტთა კომისიის წევრები. რატომ გასაჯაროვდა შუალედური დასკვნა და პასუხგაუცემელი დარჩა იმ 14 შეკითხვის ნაწილი? გამოძიებამ წერილობით მოგვმართა და გვთხოვა, საზოგადოების მხრიდან არსებული მაღალი ინტერესიდან გამომდინარე პასუხების გაცემა კითხვების ნაწილზე, თუკი ეს ამ ეტაპზე უკვე შესაძლებელი იყო. პასუხი გაეცა 8 შეკითხვას – შესაბამისი ანალიზის საფუძველზე, საქმის მასალების დეტალური შესწავლით, შემთხვევის ადგილზე დამატებითი გასვლის რეჟიმში ექსპერტთა კომისიის წევრები მივედით ერთობლივ გადაწყვეტილებამდე და აზრთა სხვადასხვაობას ამ ეტაპზე ადგილი არ ჰქონია. ცალსახად დადგინდა, რომ შაქარაშვილი ამ დაზიანებებს ხიდიდან ჩამოვარდნით და წყალში დაცემით ვერ მიიღებდა. ამავდროულად, ცალსახად გამოირიცხა, რომ მას ბილიკზე დაგორებით მიეღო ეს დაზიანებები, რამეთუ მაშინ მას სხვა სახის დაზიანებები ექნებოდა. შესაბამისად, დასკვნაში აღვნიშნეთ, რომ ამ დაზიანებებს შაქარაშვილი მიიღებდა მკვრივი ბლაგვი საგნის საკმაო ძალის ზემოქმედების შედეგად. წელზე სიგრძივი ფორმის სისხლნაჟღენთი გვაძლევდა საშუალებას, მაღალი ალბათობით გვეთქვა, რომ ეს დაზიანება ხელკეტის მსგავსი საგნით იყო მიყენებული. ყველა დაზიანება სიცოცხლის დროინდელია.
რაც შეეხება დარჩენილ კითხვებს, ალექსანდრე გეჯაძე ამბობს:
„გარდა შუალედური ექსპერტიზისა, მეორე ექსპერტიზას, რომელიც დასრულდება შესაბამის ვადებში, გაეცემა პასუხი ერთ-ერთ მნიშვნელოვან საკითხს, თუ რამდენი ხანი იმყოფებოდა გიორგი შაქარაშვილი წყალში და შესაბამისად, ნაადრევი თუ მოგვიანებითი გვამური მოვლენების თანაარსებობის რესურსი იყო თუ არა. ჩვენ გავეცნობით წყლის სიღრმეს, ტემპერატურას და რიგი საკითხების შესწავლის შემდეგ ყველა დანარჩენ შეკითხვას გაეცემა სრული და ამომწურავი პასუხი“, – აცხადებს გეჯაძე.
„სცემეს და მდინარეში გადააგდეს“ – პროკურატურამ შაქარაშვილის საქმეზე ბრალდებულ 5 პირს ბრალი დაუმძიმა
