სამთავრობო კაბინეტის შემადგენლობის ნაწილმა, შესაძლოა, პარლამენტში გადაინაცვლოს. ამის შესახებ ინფორმაციას კავკასიის საკითხებში ექსპერტი მამუკა არეშიძე „პრაიმტაიმნიუსს“ აწვდის. როგორც არეშიძემ განაცხადა, პრემიერ-მინისტრი გიორგი გახარია, სავარაუდოდ, „ქართული ოცნების“ სიის პირველი ნომერი იქნება.
„ქართული ოცნების“ პროპორციულ სიაში, შესაძლოა, რამდენიმე მინისტრი იყოს. ასევე, სიაში, სავარაუდოდ, იქნება პრემიერი გიორგი გახარია. რაც შეეხება მინისტრებს, სავარაუდოდ, თეა წულუკიანი იქნება „ოცნების“ სიაში, ხოლო გახარია- სიის პირველი ნომერი. სხვა დამატებით ინფორმაციას ვერ მოგაწვდით”,- განაცხადა არეშიძემ.
ამასთან, როგორც არეშიძე აცხადებს, ოპოზიციამ ხელისუფლების დამარცხების შანსი დაკარგა, რადგან ოპოზიციამ არჩევნებისთვის გაერთიანება ვერ მოახერხა.
„ის, რაც ოპოზიციას ჰქონდა ჩაფიქრებული, რომ ხელისუფლება დაემარცხებინა და კონსოლიდირებულად მიეღწია წარმატებისთვის, ეს ამბავი ჩაიშალა. ხომ ხედავთ, ერთმანეთს კანდიდატები დაუყენებს. 1%-იანი ბარიერის გამო, უამრავი პარტია იღებს არჩევნებში მონაწილობას, აქედან გამომდინარე, განსაკუთრებით ოპოზიციის ხმები ძალიან დაიქსაქსება. მე დარწმუნებული ვარ, რომ არჩევნებში „ქართული ოცნება“ გაიმარჯვებს“,- განაცხადა არეშიძემ.
იმ შემთხვევაში, თუ კორონავირუსის პანდემიამ დღის წესრიგი არ შეცვალა, საპარლამენტო არჩევნები 2020 წლის 31 ოქტომბერს გაიმართება. არჩევნების შემდეგ, პარლამენტი 30 მაჟორიტარით და 120 – პროპორციულ სიაში შესული შესული დეპუტატით დაკომპლექტდება.
ავტორი: ეკატერინე ზარნაძე
