თამარ ბაჩალიაშვილის ოჯახის წევრები, ადვოკატ მიხეილ რამიშვილთან ერთად, გენერალურ პროკურორს, ირაკლი შოთაძეს ხვდებიან.
ირაკლი შოთაძისგან, გარდაცვლილი პროგრამისტის მშობლები, ექსპერტიზის შედეგების გაცნობასა და საქმის გადაკვალიფიცირებას ელოდებიან.
პროკურატურაში შესვლამდე მედიასთან კომენტარი გააკეთა მიხეილ რამიშვილმა. მისი თქმით, ისინი ექსპერტიზის შუალედურ და საბოლოო დასკვნებს მოითხოვენ. ასევე აინტერესებთ, რატომ არ არის ამდენი ხნის განმავლობაში ექსპერტიზის პასუხები ცნობილი მაშინ, როცა ტოქსიკოლოგიურ დასკვნას 1 კვირაც არ სჭირდება.
რამიშივილის ეჭვები ეჭვები უკავშირდება შემთხვევის ადგილს და იმას, თუ როგორ მოხდა ისე, რომ ცხედარი 5 დღის განმავლობაში ვერ ნახა მწყემსმა, თუ ამ პერიოდის განმავლობაში ავტომობილი სწორედ ამ ადგილას იყო.
ადვოკატის განცხადებით, უნდა დაიკითხოს უცხოეთში მყოფი ის ადამიანი, რომელსაც თამარ ბაჩალიაშვილის მიერ თითქოს პოლიტიკური თავშესაფრის მოთხოვნაზე აქვს ინფორმაცია.
მისივე თქმით, ექსპერტიზის დასკვნის მიღებაზეც იქნება საუბარი, რადგან ადვოკატის განცხადებით, უკვე საკმარისი დროა გასული.
23 წლის თამარ ბაჩალიაშვილი თეთრიწყაროს ტყეში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.
თბილისში, ქვემო ფონიჭალაში მცხოვრები თამარ ბაჩალიაშვილი ვიდეოკამერებმა ბოლოს სოფელ ხაიშთან დააფიქსირეს. გოგო ნაცრისფერი ჰუნდაის მარკის მანქანით გადაადგილდებოდა.
მედიასთან მცირე კომენტარი გააკეთა ბაჩალიაშვილის დედამაც, რომელმაც განაცხადა, რომ „რევერანსების დრო დასრულდა“.
თეონა თამაზაშვილი თქმით, ამიერიდან „მაქსიმალურად რადიკალური იქნება“, თუმცა რა იგულისხმა, თამაზაშვილს აღარ დაუკონკრეტებია.
