საქართველო საერთაშორისო მედიის ყურადღების ცენტრში კიდევ ერთხელ ექცევა. 5 ივლისს თბილისში განვითარებული მოვლენები Googles-ის საძიებო სისტემაში მეტწილად, შემდეგი აღწერით იძებნება – „თბილისი პრაიდი ძალადობრივი საპროტესტო აქციების ფონზე გაუქმდა“.

გამოქვეყნებულ სტატიებში ნათქვამია, რომ რადიკალურმა ძალებმა  თბილისი პრაიდის ოფისი დაარბიეს და ჟურნალისტებს, სამოქალაქო აქტივისტებს თავს დაესხნენ.

„საქართველოში ლგბტქია+  თემს პრაიდის გაუქმება მოუწია, მას შემდეგ რაც მემარჯვენე ძალებმა მათი ოფისი დაარბიეს. ძალადობრივი ჯგუფები თავს დაესხნენ ჟურნალისტებსაც, რის შედეგადაც, სულ მცირე, მედიის 20 წარმომადგენელი, დაშავდა. რადიკალურმა ჯგუფებმა დაწვეს ლგბტქია მოძრაობის დროშაც“,-  წერს BBC-ი.

გამოცემას ასევე მოყვანილი აქვს თბილისი პრაიდის განცხადებაც, სადაც აღნიშნულია, რომ ძალადობრივი საპროტესტო აქციების გამო პრაიდი აღარ ჩატარდება, რადგან „მოძალადეებით სავსე ქუჩაში და რისკის ქვეშ ადამიანის სიცოცხლეს ვერ დააყენებენ“.

„მიუხედავად იმისა, რომ საქართველოში სექსუალური ორიენტაციის გამო ადამიანთა დისკრიმინაცია უკანონოა, აღმოსავლეთ ევროპასა და დასავლეთ აზიას შორის მდებარე ქვეყანა კვლავ ძალიან კონსერვატიულია“,- აღნიშნულია BBC-ის სტატიაში.

??? #Georgia

Violent alt-right groups have just stormed @TbilisiPride office, they are climbing up the third floor where the office is located. The environment is not safe not for just organizers of #TbilisiPrde21, but for journalists as well.

LIVE: https://t.co/HlepcbSNu0 pic.twitter.com/5HbT9TnJvs

— Shame Movement (@Shamemovement) July 5, 2021

5 ივლისს თბილისში განვითარებულ მოვლენებს გამოეხმაურა ბრიტანული გამოცემა Guardian-იც.

„კონტრაქციის მონაწილეები პრაიდის ოფისს თავს დაეხნენ. პარალელურად მღვდლის ტანსაცმელში გამოწყობილი გრძელწვერიანი კაცები ჟურნალისტებს მუშტებს ურტყავდნენ. მედიის ერთ-ერთი წარმომადგენლის თქმით, მას ჯოხით სცემეს. სხვები კი ამბობენ, რომ თავდასხმის შედეგად დაზიანდა მათი ტექნიკა. საქართველოს პრემიერ-მინისტრმა, ირაკლი ღარიბაშვილმა ძალადობრივ საპროტესტო აქციების პროვოცირებაში თბილისი პრაიდის ორგანიზატორები დაადანაშაულა. პარლამენტის ზოგმა წევრმა კი პასუხისმგებლობა რადიკალურ ოპოზიციურ პარტიებს დააკისრა“,- იუწყება The Guardian.

The Guardian-ი აღნიშნავს, რომ საქართველოში პრაიდის ჩატარებას მუდმივად კონტრაქციები და ძალადობრივი პროტესტი მოსდევს.

Aljazeera კი წერს, რომ მიუხედავად იმისა, რომ თბილისი პრაიდის ჩატარებამდე ხელისუფლებამ ლგბტქია აქტივისტების დაცვის პირობა დადო, ქვეყნის პრემიერმა, ირაკლი ღარიბაშვილმა სრულიად განსხვავებული განცხადება გააკეთა და აღნიშნა, რომ მარშის ჩატარება „მიზანშეუწონლად“ მიაჩნია.

„ქვეყნის პრემიერის თქმით,  პრაიდი სამოქალაქო დაპირისპირების საფრთხეს შეიცავდა. ირაკლი ღარიბაშვილმა თბილისი პრაიდის ორგანიზებაში საქართველოს ყოფილი პრეზიდენტი მიხეილ სააკაშვილი და მისი ოპოზიციური პარტია „ნაციონალური მოძრაობა“ დაადანაშაულა“,- წერს Aljazeera.

Aljazeera-ს სტატიაში ასევე მოყვანილია ინფორმაცია გასულ წლებში მომხდარი მოვლენების შესახებ, რომლებიც თბილისი პრაიდის ღონისძიებებს უკავშირდებოდა.  სტატიის ქვეთავში, სახელწოდებით „სახელმწიფოს მარცხი“, Aljazeera წერს:

„ძლიერი მართლმადიდებელი ეკლესია დასავლეთისკენ მიდრეკილ მთავრობებთან კონფრონტაციაშია. ამიტომ საქართველო კვლავ კონსერვატიულ ქვეყანად რჩება“.

თბილისი პრაიდის გარშემო განვითარებულ მოვლენებს ეხმაურება DW-ც.

„მართლმადიდებელმა ეკლესიამ მხარდამჭერებს შეკრებისკენ მოუწოდა, რათა მათ საყოველთაო ლოცვის პროცესში მიეღოთ მონაწილეობა, რომელიც ლგბტქია თემის წინააღმდეგ იყო მიმართული. კონტრაქციის მონაწილეებმა დაარბიეს პრაიდის ოფისი, ერთ-ერთი აქტივისტი ხალხის მასაში მოტოციკლით შევარდა. პროტესტის მონაწილეები, მათ შორის მართლმადიდებლური ეკლესიის წარმომადგენლები ჟურნალისტებს დაესხნენ თავს. სოციალურ ქსელში გავრცელდა ფოტოც, სადაც ჩანს, რომ ნაცემ ჟურნალისტს, რატი წვერავას მღვდელი მიათრევს“,- აღნიშნავს DW.

TV Formula journalist Rati Tsverava was attacked by anti-pride protesters near the Kashveti Church on Rustaveli Avenue. Tsverava was dragged away in a headlock by Georgian Orthodox priests. #TbilisiPride21

⚡️Live updates: https://t.co/7zEZax7riP pic.twitter.com/Xw0y03HZ4t

— OC Media (@OCMediaorg) July 5, 2021

Washington Post-ი ყურადღებას ამახვილებს იმ ფაქტზეც, რომ ძალადობრივი ჯგუფები თავს პოლონელ ტურისტსაც დაესხნენ, რის გამოც მისი ჰოსპიტალიზება გახდა საჭირო.

„ლგბტქია თემის მიმართ მტრული განწყობა განსაკუთრებით ძლიერია კონსერვატიულ საქართველოში, ყოფილ საბჭოთა რესპუბლიკაში. მომხდარი საქართველოს პრეზიდენტმა, სალომე ზურაბიშვილმა დაგმო, მაშინ, როდესაც ქვეყნის პრემიერ-მინისტრმა მარშის ორგანიზება რადიკალურ ოპოზიციურ პარტიებსა და საქართველოს ყოფილ პრეზიდენტს, მიხეილ სააკაშვილს დააბრალა“,- იუწყება Washington Post-ი.

Bloomberg-ი კი წერს, რომ „საქართველოს შინაგან საქმეთა სამინისტრომ, რომელიც თბილისი პრაიდს მოუწოდებდა საზოგადოების დამოკიდებულების გამო მარში არ ჩაეტარებინა, მოგვიანებით განცხადება გაავრცელა, სადაც აღნიშნა, რომ თბილისი პრაიდის ოფისებზე თავდასხმის ფაქტზე გამოძიება დაიწყო. მომხდარი დაგმო საქართველოს სახალხო დამცველმაც“.

გამოქვეყნებულ სტატიებში აღნიშნულია, რომ  თბილისში განვითარებულ მოვლენებს სხვადასხვა ქვეყნის საელჩოები და საქართველოში ევრვოკავშირის წარმომადგენლებიც გამოეხმაურნენ და მომხდარი დაგმეს.

მომზადებულია BBC-ის, Guardian-ის,  Aljazeera-ს, DW-ს, Washington Post-ის, Bloomberg-ის  მიხედვით

ავტორი: ნინი ტაველიძე, საინფორმაციო სააგენგო PTN.ge