დღეს დილით 7 საათზე თბილისის მერიამ სამგორის რაიონში, თვალჭრელიძის ქუჩაზე უკანონო მშენებლობების დემონტაჟი დაიწყო.
როგორც „პრაიმტაიმნიუსს“ დედაქალაქის მერიაში განუცხადეს, ამ დროისთვის 4 უკანონო ნაგებობის დემონტაჟი უკვე განხორციელდა, დარჩა კიდევ სამი.
მათივე ცნობით, აღნიშნულ საცხოვრებელ სახლებში არავინ არ ცხოვრობდა და მოქალაქეების ნაწილმა თავადვე მიიღო მონაწილეობა მიმდინარე ტერიტორიიდან სამშენებლო მასალის გატანაში.
ცნობისთვის, 18 დეკემბერს თბილისის მერიაში განაცხადეს, რომ სამგორის რაიონში, თვალჭრელიძის ქუჩის მიმდებარედ, სახელმწიფო მიწაზე 7 უკანონო მშენებარე შენობა-ნაგებობა დააფიქსირეს.
მათივე ინფორმაციით, ინსპექციის თანამშრომლებმა, ვინაიდან მაცხოვრებლები ტერიტორიაზე არ იმყოფებოდნენ, ობიექტებზე გამაფრთხილებელი მოთხოვნები გამოაკრეს და იქ მაცხოვრებლებს მოუწოდეს, განეხორციელებინათ მშენებლობების დემონტაჟი.
წინააღმდეგ შემთხვევაში კი თბილისის მუნიციპალური ინსპექცია შენობა-ნაგებობების დემონტაჟს აანონსებდა.
