ერთი პარტიის სამი სახე, სამი განსხვავებული პოზიცია და ბუნდოვანი პოლიტიკური გადაწყვეტილებები – ეს „გირჩის“ სამი ლიდერია.
იაგო ხვიჩია აცხადებს, რომ ვინც მათ პარტიულ ინტერესს გაატარებს, იმისკენ იქნებიან.
ვახტანგ მეგრელიშვილი სოციალურ ქსელში წერს, რომ თუ კოალიციური მთავრობის პრემიერმინისტრი მიხეილ სააკაშვილი იქნება დიდი ალბათობით, ივანიშვილისკენ გადავლენ.
ხოლო ზურაბ ჯაფარიძე ამბობს, რომ „ქართულ ოცნებას“ კოალიციას არ შეუქმნის…
„ტვ პირველის“ ეთერში ჟურნალისტის კითხვას – შეუქმნის თუ არა „გირჩი“ კოალიციას „ქართულ ოცნებას“? ჯაფარიძე პასუხობს, რომ „რა თქმა უნდა, არა.“
ჯაფარიძის ამ განცხადებამდე, „გირჩის“ ერთ-ერთმა ლიდერმა იაგო ხვიჩიამ „ნეტგაზეთს“ განუცხადა, რომ პარლამენტში შესვლის შემთხვევაში, მათი ხმები ენმ-საც სჭირდება და ოცნებასაც, სააკაშვილსაც და ივანიშვილსაც, პარტიის ხმას დაიმსახურებს ის, ვინც მის ინტერესებს „მეტ თავისუფლებას“, სასამართლოს დამოუკიდებლობასა და ერთპარტიულობის დასრულებას გაატარებს.
ხვიჩიას ამ განცხადებამდე, „გირჩის“ კიდევ ერთმა ცნობილმა სახემ ვახტანგ მეგრელიშვილმა განაცხადა, რომ ოპოზიციის მოგების შემთხვევაში, კოალიციური მთავრობის პრემიერობის ყველაზე მაღალი შანსი მიხეილ სააკაშვილს ექნება და ის სისტემის ხელში ჩაგდებას მოინდომებს.
ამის გამო, „გირჩი“ და სხვა ოპოზიციური პარტიები ივანიშვილისკენ გადავლენ.
ცნობისთვის, იაგო ხვიჩია წინა ხელისუფლების დროს მუშაობდა თბილისის მერიის, განათლებისა და კულტურის საქალაქო სამსახურის იურისტად. იგი ასევე იყო საქართველოს იუსტიციის სამინისტროს ს.ს.ი.პ. საჯარო რეესტრის ეროვნული სააგენტოს თბილისის სარეგისტრაციო სამსახურის იურიდიული განყოფილების უფროსის მოადგილე, შემდგომ კი 2009-2013 წლებში იურიდიული დეპარტამენტის უფროსი.
ვახტანგ მეგრელიშვილი ასევე წინა ხელისუფლების დროს, იყო ჯანდაცვის მინისტრის პირველი მოადგილე.
ხოლო ზურაბ ჯაფარიძე 2012-2015 წლებში იყო „ერთიანი ნაციონალური მოძრაობის“ წევრი და საქართველოს მერვე მოწვევის პარლამენტის დეპუტატი.
