„ერთი ფურცლის გამო, მათი არჩევნებიდან მოხსნის საკითხის დაყენება არასერიოზულია“,- ამის შესაებ უმრავლესობის ვიცე-სპიკერმა, გია ვოლსკიმ „პატრიოტთა ალიანსის“ შესახებ გამოქვეყნებულ სტატიასთან დაკავშირებით განაცხადა.
როგორც გია ვოლსკი ამბობს, ამ საკითხთან დაკავშირებით უნდა იყოს მსჯელობა.
„ვერ წარმომიდგენია დღეს ვინმე “პატრიოტთა ალიანსის” ადვოკატი იყოს. საგარეო კურსისა და ამაზე მათი დამოკიდებულების გამო, ჩვენ მათზე საკმაოდ ჩამოყალიბებული პოზიცია გვაქვს, მაგრამ ერთი ფურცლის გამო, მათი არჩევნებიდან მოხსნის საკითხის დაყენება არასერიოზულია. ამაზე უნდა იყოს მსჯელობა, მოკვლევა და გადაწყვეტილებაც აქედან გამომდინარე უნდა მივიღოთ“,- განაცხადა გია ვოლსკიმ.
ცნობისთვის, არასამთავრობო ორგანიზაცია „დოსიემ“ დღეს კიდევ ერთი დოკუმენტი გამოაქვეყნა, რომლის მიხედვითაც ირმა ინაშვილის პარტია მოსკოვიდან იმ გზავნილების სიას იღებდა, რომელიც წინასაარჩევნოდ საქართველოში უნდა გაეჟღერებინა.
„დოსიეს“ ინფორმაციით, რუსი კურატორები დავით თარხან-მოურავს და ირმა ინაშვილს სთხოვდნენ სექტემბრის დასაწყისში საქართველოს პარლამენტის პიკეტირება დაეწყოთ, სადაც მონაწილეობას ბათუმიდან ჩამოყვანილი აქტივისტები მიიღებდნენ.
იქამდე, გამოქვეყნდა ინფომრაცია, რომ წინასაარჩევნოდ კრემლი საქართველოში „პატრიოტთა ალიანსს“ პირდაპირ ეხმარება. ამასთან დაკავშირებით სახელმწიფო აუდიტის სამსახურმა მოკვლევა უკვე დაიწყო.
