საქართველოს პარლამენტის თავმჯდომარის პირველი მოადგილე გია ვოლსკი, აზერბაიჯანული მედიით გავრცელებულ ინფორმაციას ეხმაურება, რომლის მიხედვითაც თოვუზის რეგიონის დასაბომბად განკუთვნილი ნაღმტყორცნები, სერბეთმა სომხეთს, საქართველოს გავლით მიაწოდა.
გია ვოლსკის თქმით, ეს არის ჭორი, რომელიც საქართველოში „კონკრეტული მედიასაშუალებები აყვნენ.“
„აზერბაიჯანული მხარე ამას ასე არ თვლის, არის გარკვეული მედიასაშუალებები, რომლებიც ამ ჭორს აყვნენ. სამწუხაროდ, საქართველოშიც და კონკრეტული ტელევიზიებიც ვიცი, ვინც აჰყვა ამ ჭორს და გაუკეთეს ტირაჟირება, იმას რასაც საქართველოსთვის ზიანის მოტანის გარდა, არაფერი არ შეუძლია, განსაკუთრებით წინასაარჩევნო პერიოდში.
როდესაც ვიცით, რომ აზერბაიჯანელი და სომეხი მოსახლეობა საკმაოდ ბევრია ჩვენთან რეგიონებში და ამდენი ხნის მანძილზე ვინარჩუნებთ/ინარჩუნებენ კეთილგონიერებას. გავიხედოთ ვის უნდა დესტაბილიზაცია და ადვილად გავაკეთებთ დასკვნებს“, – განაცხადა ვოლსკიმ.
ცნობისთვის, აზერბაიჯანულმა გამოცემამ haqqin.az -მა გამოაქვეყნა სტატია, სადაც საუბარია, „რომ სომხეთი აზერბაიჯანზე თავდასხმას ადრეულ ეტაპზე გეგმავდა“.
გამოცემა ინფორმაციას სამხედრო წყაროებზე დაყრდნობით ავრცელებს და წერს, რომ თავდასხმამდე რამდენიმე დღით ადრე, ასევე სამხედრო მოქმედებების მიმდინარეობის დროსაც, სერბეთიდან სომხეთში, საქართველოს გავლით, სხვადასხვა კალიბრის, დიდი რაოდენობით ნაღმტყორცნები ჩაიტანეს.
